Simon Busuttil qed ikompli juri biċ-car li Malta verament tista' timxi 'l quddiem fis-sewwa u l-ġustizzja jekk ikun il-Prim Ministru.
M’iniex se nitkellem fuq l-għaxar punti li kellna bżonn biex nidħlu fl-Università ta’ Malta fi żmien il-‘ħakma’ Soċjalista! Għall-benefiċċju ta’ dawk il-qarrejja żgħażagħ jew dawk li għandhom inqas minn 50 sena, matul il-‘ħakma’ mingħajr maġġoranza tal-Gvern Soċjalista, dawk l-istudenti kollha li kienu jattendu sixth forms tal-Knisja jew tal-privat kienu diskriminati milli jidħlu fl-Università. Dan għaliex l-istudenti li kienu jattendu s-sixth form tal-Gvern kellhomgħaxar punti aktar. Għaldaqstant, dawk li kienu jattendu s-sixth form tal-Gvern kienu jgħaddu għall- Università waqt li l-istudenti l-oħra kienu jibqgħu barra! Fil-fatt, ġenerazzjoni sħiħa ta’ żgħażagħ ġiet imċaħħdamilli tkompli listudji tagħha!
Imma f’dan l-artiklu se nitkellem fuq għaxar punti oħra li huma parti mid-diskors li għamel Simon Busuttil fil-Parlament dwar il-Baġit kif ippreżentat mill-Gvern Laburista.
Min iħobb jużamoħħu u jaħseb, jaf li d-diskors ta’Simon Busuttil kien loġiku u b’argumenti reali, li juri li l-PN reġa’qiegħed iħoss il-polz taċ-ċittadini. Kien diskors ta’persuna li għandha viżjoni ċara ta’ fejn tixtieq tieħu lill-pajjjiż jekk tingħata l-fiduċja tal-poplu. Nistqarr li ma kienx diskors li kompla jikxef l-ingann u l-qerq ta’ dan il-Gvern biss, imma kien diskors li fih Simon Busuttil offra sensiela ta’ proposti konkreti. Dawn il-proposti jikkumplimentaw oħrajn li jinħarġu fid-dokument ta’qabel il-Baġit imsejjaħ ‘Nirnexxu lkoll flimkien’. Din hija t-tieni darba li partit fl-Oppożizzjoni mhux biss jistenna l-Baġit tal-Gvern immaminn qabel joffri l-ideat u l-viżjoni tiegħu lill-Gvern. Tant li l-Gvern Laburista ħa diversi proposti li hemm f’dan il-dokument. Fost dawn insibu l-proposti fuq ittnaqqis tat-taxxa fuq il-pensjonijiet, it-tneħħija ta’ żieda fuq il-kirjiet tad-djar tal-Gvern u l-għoti tas-sussidji lil dawk li jikru mingħand il-privat.
L-għaxar punti ta’ Simon Busuttil:
1. Il-PN fil-Gvern jirtira l-garanzija ta’€360 miljun lill-Electrogas u minflok joħloq l-akbar skema ta’ garanziji lil kull min għandu idea tajba, lill-istart-ups li rriduhom ikunu leaders fit-trasformazzjoni ekonomika. F’pajjiżna għandna bżonn ikollna think tank qawwi fejn jinġabru l-ideat innovattivi li jagħmlu qabża fil-kwalità.
2. Il-PN se jippubblika dokument bil-politika l-ġdida dwar is-settur tal-ħwienet; mutur fl-ekonomija, fejn hawn familji li għandhom l-għajxien tagħhom fuq dan is-settur.
3. Gvern immexximinn Gvern ġdid Nazzjonalista jixtri l-elettriku mingħand min ikun l-irħas. U jekk hu irħas mill-interconnector, jinxtara minn hemm. Dak li jiġi ffrankat jgħaddi għand il-konsumatur. Dan huwa punt importanti għaliex kif ilkoll nafu s’issa l-Gvern Laburista ntrabat li jixtri għal 18-il sena mingħand l-Electrogas meta fir-realtà l-elettriku huwa irħas mill-interconnector!
4. Gvern Nazzjonalista jagħmel lista bażika ta’ħtiġiet għal ħajja deċenti biex nistabbilixxu l-linja ta’ dħul meħtieġa biex in-nies ma jgħixux fil-faqar. Min ikun taħt dik il-linja jingħata għajnuna oħra b’mod jew b’ieħor. Huwa għajb għal dan il-Gvern li filwaqt li jiftaħar li l-ekonomija sejra tajjeb, l-ekonomija ta’nies batuti, b’mod partikulari tal-anzjani, sejra ħażin. Iż-żieda ta’€4 fil-ġimgħa tfisser fir-realtà żieda ta’€2.25 biss għax €1.75 hija ż-żieda tal-għoli tal-ħajja li ħa kulħadd. Dan ifisser li €2.25 jiġu €9 fix-xahar u €108 fissena! B’hekk se jitneħħa l-faqar?!
5. Insaħħu l-ġustizzja soċjali fil-qasam tas-saħħa billi l-mediċina lill-anzjani li llum ikollhom jixtruha, tibda tingħatalhom b’xejn.
6. Sistema alternattiva ta’ trasport pubbliku li tagħmel il-qabża li tassew għandna bżonn: sistema nazzjonali ta’ tramway jew light railway li idealment tgħaqqad lil Malta u Għawdex permezz ta’ mina taħt il-baħar.
7. Se tkun ippubblikata politika aġġornata dwar l-ambjent bi proposti konkreti f’qasam li dan il-Gvern tant qiegħed jabbuża. Biżżejjed wieħed jaqra l-proposti li hemm fil-master plan għal Paceville fejn se jinbnew madwar 22 torri.
8. Jekk il-Gvern mhux se jserraħ ras in-nies dwar ir-riskji li jista’ jkun hemm, allura Gvern ġdid immexxi mill-PN ineħħi t-tanker talgass minn Marsaxlokk.
9. Gvern immexximinn Simon Busuttil iwettaq ġustizzja ma’ min sofra inġustizzja. U jżomm ukoll responsabbli lil dawk li wettqu jew għalqu għajnejhom għall-inġustizzji li qed isiru.
10. Issir investigazzjoni indipendenti ta’kull kuntratt negozjat jew iffirmat mill-Ministru Konrad Mizzi u Keith Schembri. Mhux hekk biss imma ssir investigazzjoni serja fuq il-kontijiet sigrieti ta’ dawn iż-żewġ sinjuri li ħammġu mhux daqstant isimhom imma ħammġu isimna lkoll.
Għall-kuntrarju ta’għaxar punti tal-mistħija li semmejt fil-bidu li kienu ddaħħlu mill-Gvern Soċjalista, dawn l-għaxar punti li semma Simon Busuttil ikomplu juru biċ-ċar li Malta verament tista’ timxi ’l quddiem fis-sewwa u l-ġustizzja jekk hu jkun il-Prim Ministru.
(Dan l-artiklu ġie ippublikat fuq il-gazzetta Il-Mument – 6 ta' Novembru, 2016)
Comments