Il-kritika ġenwina tista' biss tibnina u ssaħħaħna. Il-kritika ġenwina tagħmilna aktar sodi f'fehmietna.
Din hija mistoqsija li diversi Nazzjonalisti ġenwieni qegħdin jistaqsu. Għaliex nemmen fl-onesà u ma nħobbx ninħeba wara subgħajja, nistqarr li għandna nkunu umli, kuraġġużi u fuq kollox, onesti ma’ xulxin u nammettu li sfortunatament, il-Partit Nazzjonalista għaddej minn mumenti xejn feliċi. Mingħajr forsi ma jrid, il-Partit fir-realt. qiegħed iwassal messaġġ li jinsab f’dar maqsuma!
Iż-żewġ telfiet ‘kissrulna’ l-moral, l-elezzjonijiet interni, b’mod partikolari dawk tal-kap u tal-eżekuttiv, ġellduna. Nazzjonalist spiċċa jitgħajjar u jwarrab Nazzjonalist! Dan qiegħed ngħidu b’għafsa ta’ qalb.
Billi wieħed jipprova jdaħħal rasu fir-ramel, il-problema tikber tista’. Għaldaqstant, l-ewwel pass ta’ fejqan huwa li wieħed jammetti li għandu problema! It-tieni pass huwa li jkun lest li jagħmel xi ħaġa dwarha!
Kull min għandu esperjenza fil-counselling tal-koppji, jaf li ġeneralment, l-ebda naħa ma għandha tort jew raġun kompletament. Kif jgħidu bl-Ingliż: it takes two to tango. Lesperjenza turina li ż-żewġ naħat ikunu taw il-kontribut tagħhom! L-esperjenza fil-counselling turina wkoll li biex wieħed jipprova joffri soluzzjoni aħħarija, l-ewwel ħaġa li għandu jagħmel hija li jipprova jifhem liż-żewġ naħat u jara s-sitwazzjoni bil-lenti ta’ dik in-naħa.
Biex nifhmu aħjar dak li qiegħed iseħħ fostna bħala Partit, tajjeb li wieħed, fil-kalma u mingħajr l-ebda emozzjonijiet żejda, jipprova jifhem id-diversi vuċijiet. Li wieħed jipprova jsikket jew iwarrab dawn il-vuċijiet, mhux biss ma jasal imkien imma jkun qiegħed jagħmel aktar ħsara u jġib aktar firda. Għaldaqstant, nagħmlu tajjeb li nifhmu aktar milli nikkundannaw u nwarrbu.
Nemmen li hemm ċerta suppervja politika li qiegħda tgħammad għajnejn diversi nies. Bħal kull suppervja, is-suppervja politika (li jbati minnha anke JosephMuscat) ma tħallikx tara u tisma’ in-naħa l-oħra. Is-suppervja politika tgħidlek li jekk wieħed rebaħ, allura għandu jkaxkar kollox u lil kulħadd. Is-suppervja politika tgħidlek li dawk li huma jew li kienu kontrik, għandek tagħtihom il-ġenb jew turihom il-bieb ta’ barra. Is-suppervja politika ma taċċettax li titlef l-argument. Is-suppervja politika ġġiegħlek tagħlaq widnejk għall-opinjonijiet differenti u taħseb li kull kritika hija negattiva u b’aġenda moħbija biex tagħmel il-ħsara.
Tajjeb li nifhmu li jekk il-Partit irid jerġa’ jkun fit-tmexxija, allura għandu bżonn lil KULĦADD! L-ebda naħa jew oħra ma għandha s-saħħa weħedha. Tajjeb li nifhmu li l-ebda partit ma jitla’ fit-tmexxija bit-tesserati waħdu.Min-naħa l-oħra, l-ebda partit lanqas ma jiġi elett mingħajr il-vot tat-tesserati! Ejjew mela nibżgħu għal xulxin! Ejjew nieqfu nħarsu ikrah lejn xulxin! Il-ħars ikrah ma jiġbed lil ħadd. Ejjew ma nibżgħux mill-kritika, sakemm din hija waħda ġenwina! Il-kritika ġenwina tista’ biss tibnina u ssaħħaħna. Il-kritika ġenwina tagħmilna aktar sodi f’fehmietna. Fl-imgħoddi, il-Partit Nazzjonalista tkellem u ħadem qatigħ fuq il-bżonn tar-rikonċiljazzjoni fost il-Maltin. Dan seħħ wara li l-pajjiż kien għadda minn mumenti iebsa fil-mixja demokratika.
Hemm bżonn li issa din l-għajta ta’ rikonċiljazzjoni terġa’ tissemma’ u titħaddem fostna. Il-Partit għandu bżonn ir-rikonċiljazzjoni għaliex fl-għaqda biss hemm is-saħħa.
Għaldaqstant, qiegħed nistieden lit-tmexxija l-ġdid (li fuqha tistrieħ ir-responsabbiltà ewlenija) li toħloq struttura li fiha jkun hemm proċess ta’ fejqan u ta’ rikonċiljazzjoni. Persuni politiċi li jgawdu l-fiduċja ta’ kulħadd, bħalma huma Louis Galea, Joe Borg u Tonio Borg, fost l-oħrajn, għandhom jiġu mitluba biex jgħinu f’dan il-proċess. Għandna bżonn politiċi li huma ambaxxaturi tal-paċi u mhux aġendi ta’ firda u inkwiet.
Ktibt dawn il-kelmiet bi spirtu onest. Napprezza jekk il-qarrejja jaqrawhom bl-istess spirtu! Nemmen bis-sħiħ li Malta għandha bżonn lill-Partit Nazzjonalista b’saħħtu quddiem il-korruzzjoni sistematika tal-Gvern Laburista. Għaldaqstant, napprezza li ħadd ma juża kliemi biex isawwat naħa jew oħra!
Nemmen fil-politika tal-għaqda għaliex jingħad li dar maqsuma fiha nnifisha ma żżommx sħiħ fit-tul u fl-aħħar tiġġarraf u kbira tkun it-telfa.
Dan mhuwiex kliemi imma kliem ta’min wieħed joqgħod fuqu!
(Dan l-artiklu ġie ippublikat fuq il-gazzetta Il-Mument – 19 ta' Novembru, 2017)
Comments