Għalkemm Simon Busuttil stqarr li ma għandu l-ebda 'deheb u fidda' li bihom jista' jistri l-voti, għandu ħaġa waħda: jista' joffri l-onestà u l-integrità politika tiegħu.
“Deheb u fidda ma għandix. Imma minn dak li għandi se nagħtik… qiegħed ngħidlek, aqbad friexek u qum.” Dan kien kliem Xmun Pietru fil-bidu tal-ħidma tiegħu bħala Appostlu tal-Mulej. U dak li kien magħtub, qam. Dak li kien bla saħħa, reġa’ ħa saħħtu.
Din hija l-ġrajja li ftakart fiha meta nhar it-Tlieta smajt lil Xmun ieħor, Simon Busuttil, jitkellem. Il-kliem ta’ Simon Busuttil kien kliem qawwi ta’ mexxej. Simon Busuttil kien ċar daqs il-kristall. Stqarr li ma jista’ joffri lil ħadd xi impjieg mal-Gvern. Lanqas ma jista’ jagħti xi post tal-housing, permess ta’ bini jew xi kuntratt ta’ xogħol. Imma għalkemm Simon Busuttil stqarr li ma għandu l-ebda ‘deheb u fidda’ li bihom jista’ jixtri l-voti, għandu ħaġa waħda x’jista’ joffri.
Simon Busuttil stqarr li jista’ joffri l-onestà u l-integrità politika tiegħu.
Fir-realtà nafu li l-ġewwieni ta’ dan il-pajjiż sejjer lura bħal granċ. Għalkemm l-ekonomija hija tajba, x’jiswa jekk nitilfu l-valuri u l-prinċipji li jsaħħuna u jagħmluna dak li aħna? Nemmen li aktar ma jgħaddi ż-żmien, il-Gvern Laburista aktar qiegħed jitlef mhux biss il-boxxla soċjali imma tilef il-ġewwieni tiegħu.
Wara tliet snin u nofs biss, il-Gvern Laburista se jibqa’ jissemma għall-iskandli li ħakmuh. Għalkemm bħalissa qegħdin nitkellmu fuq l-iskandlu tal-ħruġ tal-visas mediċi lil Libjani, l-akbar skandlu huwa dak tal-kontijiet sigrieti li Konrad Mizzi u l-Keith Schembri nqabdu li fetħu ftit jiem biss wara r-rebħa tal-elezzjoni!
Il-vot li kien hemm kontra Leo Brincat ma kienx vot kontra l-persuna ta’ Leo Brincat. Kulħadd jifhem li Leo, bħal Toni, kien il-ħaruf tas-sagrifiċċju. Dan il-vot kien kontra l-Gvern korrott ta’ Joseph Muscat. Dan kien il-messaġġ wara dan il-vot, ġej mhux biss mill-Partit Popolari imma anke mill-grupp Soċjalista!
Is-Soċjalisti u gruppi politiċi oħrajn huma preokkupati bil-livell ta’ korruzzjoni li ħakem lill-Gvern Laburista Malti. Għaldaqstant dak li huwa aċċettabbli għal Joseph Muscat mhuwiex aċċettabbli għas-Soċjalisti. L-istandards ta’ Joseph mhumiex l-istandards Ewropej li jitolbu li l-gvernijiet jitmexxew b’onestà u b’integrità sħiħa.
Simon Busuttil qiegħed iwiegħed li jekk il-poplu jerġa’ jagħti l-fiduċja lill-PN, huwa se jkun Prim Ministru li jmexxi gvern serju b’onest. u b’integrit. sħiħa. Jien nemmnu. Jien nafdah. Ħafna għandhom l-istess fehma tiegħi.
Simon Busuttil semma kif il-PN jixtieq jerġa’ ikun tarka għal dawk il-persuni li jinsabu fit-tarf tas-soċjetà u li għaddejjin minn mumenti diffiċli. Stqarr li huwa qiegħed fil-politika biex ikun vuċi għalihom. Stqarr li huwa jixtieq imexxi gvern li jagħti widen għall-aspirazzjonijiet u d-diffikultajiet tal-poplu kollu. Qal li l-gvern immexxi minnu se jkun gvern ta’ kulħadd u mhux tal-ftit, kif spiċċa jkun dan il-Gvern Laburista.
Din il-viżjoni għandha timla b’kuraġġ u determinazzjoni lil dawk iċ-ċittadini u politiċi onesti li jixtiequ li dan il-pajjiż ma jispiċċax jitmexxa minn klikka żgħira li l-uniku interess tagħha huwa li jsiru sinjuri l-membri fiha u sħabhom. Aktar ma jgħaddi ż-żmien, aktar joħroġ ċar li b’Simon Busuttil fit-tmexxija, il-pajjiż jista’ jerġa’ jiskopri l-onestà u l-integrità li tilef u joħroġ minn din il-kultura u xibka sħiħa ta’ korruzzjoni.
Ċert li l-Gvern Laburista se jipprova jixtri l-voti ‘bid-deheb u l-fidda’. Ċert li l-Gvern Laburista, ibda mill-Baġit li ġej, se jibda jroxx il-bżar. Ċert li l-Gvern Laburista se jerġa’ jilbes il-maskra tal-ħaruf.
Imma l-poplu tista’ tidħak bih darba… imma mhux darbtejn. Għaldaqstant, il-poplu jrid jagħmel għażla ta’ x’tip ta’ soċjetà jrid jgħix fiha hu u wliedu. Din hija għażla bejn l-onestà u l-ipokresija. Hija għażla bejn il-korruzzjoni u l-integrità.
Hija għażla bejn id-daħk fil-wiċċ u s-sinċerità. Hija għażla bejn il-bżar fl-għajnejn u s-sewwa. Hija għażla bejn il-kliem ħelu u l-fatti. Hija għażla bejn min jista’ ‘jagħti d-deheb u lfidda’ u min lest jagħti l-fibra mill-ġdid lill-pajjiż. Hija għażla bejn l-ingann u s-sewwa.
Nemmen li l-poplu dejjem għażel li s-sewwa jirbaħ żgur! Hekk ġara u hekk jerġa’ jiġri.
(Dan l-artiklu ġie ippublikat fuq il-gazzetta Il-Mument – 28 ta' Settembru, 2016)
Comments