Il-kelma 'flimkien' hija impenjattiva, tikxef mod ta' ħsieb, kultura ta' azzjoni u stil ta' tmexxija.
It-tema magħżula għall-Kunsill Ġenerali tal-Partit Nazzjonalista li għadu kemm organizza kienet ‘Flimkien għal pajjiżna’. Diversi kienu dawk li tkellmu u wasslu l-opinjoni tagħhom. Ma kienx biss mument li fih wieħed seta’ jisma’ lill-oħrajn, imma anke jiltaqa’ ma’ persuni u kandidati ġodda.
Personalment, ġejt mistieden biex nindirizza lill-Kunsill u għażilt li nitkellem fuq din it-tema għaliex nemmen bis-sħiħ li mhux biss din it-tema tikxef l-għan aħħari u l-ġewwieni tal-politika, imma hija valida għal-lokalità tagħna ta’ San Ġiljan fejn mill-ġdid qiegħed nerġa’ noħroġ bħala kandidat għall-elezzjonijiet tal-Kunsilli Lokali li se jsiru fil-25 ta’Mejju 2019.
Aħna ninsabu f’din il-mixja politika proprju għal dan il-għan: li nkunu ta’ ġid għal pajjiżna. Il-politika mhix dwari. Lanqas mhi dwarek. Il-politika hija dwarna. Pajjiżna jieħu r-ruħ meta nagħmlu l-politika ta’ flimkien, jiġifieri politika fejn il-kelma ‘aħna’ tiġi qabel il-kelma ‘jien’. Għaldaqstant, għalija l-kelma ‘flimkien’ turi l-ħidma għall-ġid komuni. Donnu l-ġid komuni ma baqax ġid komuni għal xi wħud. Il-ġid komuni huwa dak il-ġid li jmur lil hinn mill-interessi tal-ftit waqt li tħares l-interessi tal-ħafna.
Dan huwa valur fundamentali li dejjem dawwal u għaġen lill-PN matul iż-żminijiet. Il-PN gawda l-fiduċja tal-poplu u għamel riformi u inizjattivi kbar proprju għaliex ġab l-ewwel mhux l-interessi tal-ftit jew inkella tal-partit imma tal-ġid komuni. Sfortunatament, din hija b’kuntrast qawwi mal-Partit Laburista li kważi dejjem fittex l-interessi tiegħu u ta’ dawk ta’ madwaru l-ewwel u qabel kollox.
Imma l-kelma ‘flimkien’ ma għandhiex tkun donnha xi buzz word li nużawha meta u fejn jaqbilna. Hekk isir hekk, allura dan ikun biss spin, fake news, daħk fil-wiċċ u ipokrisija grassa. Il-kelma ‘flimkien’ hija kelma impenjattiva, tikxef mod ta’ ħsieb, kultura ta’ azzjoni u stil ta’ tmexxija.
Ninsabu ‘flimkien’mhux biex nidhru sbieħ fir-ritratti imma għaliex flimkien nistgħu naslu, għaliex flimkien għandna bażi komuni ta’ valuri/viżjoni li jgħaqqduna flimkien. Huma dawn il-valuri tas-solidarjetà, ġustizzja soċjali, onestà, governanza tajba u tad-dinjità umana ta’ kull persuna li għandhom jispirawna biex nibqgħu naħdmu flimkien. Il-mument li dawn il-valuri jintilfu huwa l-mument li ma jibqax ikun hemm għan li nkunu flimkien.
Għalkemm xi drabi joħorġu d-differenzi ta’ ħsieb – kif jiġri f’kull esperjenza tal-ħajja – tajjeb niftakru f’dawn il-valuri li jgħaqqduna flimkien. Tajjeb li niftakru aktar fuq dak li naqblu. Ilkoll naqblu flimkien li għalkemm pajjiżna għandu surplus ekonomiku ninsabu f’defiċit etiku, fejn kollox jgħaddi u kollox jgħodd. Ilkoll naqblu li l-Gvern jiftaħar li hawn il-ġid, waqt li l-anzjani u familji oħra jinsabu għaddejjin minn mumenti ibsin.
Ilkoll naqblu li l-Gvern ikkorrompa ruħu wara ftit snin ta’ tmexxija. Ilkoll naqblu li filwaqt li Sadeem ingħata art biex jibni ‘universita fantażma’, uliedna qegħdin jitgħallmu fil-kontejners! Ikoll naqblu li l-entitajiet tal-Gvern saru donnhom każini tal-PL. Ilkoll naqblu li l-Gvern huwa mbeżża’ minn ftit xemgħat mixgħula u minn dak li jista’ joħroġ mill-iskandlu ta’ 17 Black u mill-qtil ta’ Daphne Caruana Galizia. Dan il-Gvern iħaddan politika li taġevola l-interessi tal-ftit waqt li jwarrab id-drittijiet tal-ħafna. Dan il-Gvern spiċċa mhux biss tbiegħed mill-għeruq tiegħu imma sar priġunier tal-ftit. Sfortunatament, politika ta’ dan it-tip narawha sseħħ kuljum f’San Ġiljan.
San Ġiljan jinsab taħt assedju minn min għandu kilba sfrenata biex jaħtaf u jkabbar ġidu a skapitu tar-residenti. Din il-politika qed toħloq inġustizzja soċjali għaliex hija inġustizzja meta biex tistagħna inti, tiġi taqa’ u tqum mill-interessi tiegħi/tagħna. Hekk ġara f’diversi żviluppi bla proporzjon u gost li ġew approvati, ibda minn dak ta’ Mercury House u VR, kompli bil-mostrożità ta’ DB u issa bil-Corinthia, fost ħafna oħrajn. Ironikament, f’kull applikazzjoni, il-Gvern ħares biss l-interessi ta’ dawk li fil-passat kien jgħajjarhom barunijiet biex issa spiċċa fis-sodda jixxaħxaħ magħhom.
Nistieden lill-PN jkun spalla ma’ spalla flimkien mhux biss mas-soċjeta ċivili, mal-NGOs imma mar-residenti tagħna. Kif jistgħu jappoġġjaw lilna meta aħna ma nappoġġjawx lilhom fis-siegħa tal-prova? Jien u sħabi kollha flimkien se nibqgħu nagħtu sehemna biex flimkien mal-Partit inkunu l-vuċi u t-tarka tagħhom. Ma għandniex intenzjoni li nċedu. Hekk kif l-orkestra hija magħmula minn diversi strumenti differenti li għalkemm għandhom ħoss differenti, meta jdoqqu flimkien u bl-għajnuna ta’ surmast wieħed jagħmlu sinfonija waħda, hekk ukoll il-PN.
Jalla nerġgħu nieħdu gost inkunu flimkien. Jalla ħadd ma jħossu barrani f’daru stess. Jalla lkoll ningħataw l-istess opportunitajiet biex bit-talenti differenti u diversi tagħna nistgħu nagħmlu politika li ssaħħaħ lil pajjiżna. Jalla nerġgħu niskopru l-għajta li FLIMKIEN KOLLOX HUWA POSSIBBLI.
(Dan l-artiklu ġie ippublikat fuq il-gazzetta Il-Mument – 3 ta' Marzu, 2019)
Comments