Jekk matul it-tmexxija ta' Mintoff ma kinitx tgħaddi ġimgħa li ma kienx jinqala' xi ġlied, bil-Gvern Laburista ta' issa ma tgħaddix ġimgħa li ma nisimgħux fuq xi skandlu.
Ninsabu fl-ewwel ġurnata tas-sena l-ġdida 2017. Nagħmlu tajjeb li wara li jgħaddu dawn il-festi, insibu ftit ħin u nagħmlu l-kontijiet. Huwa ferm importanti li nagħmlu l-kontijiet magħna nfusna. Persuna li ma ddurx dawra magħha nfisha, ħafna drabi tispiċċa tirrepeti l-istess żbalji. Tajjeb li nistaqsu fejn morna tajjeb u fejn morna ħażin?
Fuq livell personali
Ilkoll nifhmu li aħna ħajja waħda għandna. Nitilfu lilha u jkun ifisser li nitilfu kulma għandna. Huwa veru li meta wieħed ikun żagħżugħ, ikun moħħ ir-riħ. Iżda l-ħajja matura tfisser li aħna nużaw il-ġranet li għandna bil-għaqal. Għalhekk tajjeb li nagħmlu l-kontijiet. Jista’ jkun li matul is-sena 2016 għamilna passi ’l quddiem fil-maturità tagħna. Jista’ jkun li matul is-sena l-oħra konna ta’ kontribut għal ħaddieħor u wettaqna ħwejjeġ li jagħmlulna unur. Imma jista’ jkun li konna persuni diffiċli, kemm magħna nfusna u ma’ ħaddieħor. Ikun tajjeb li waqt li nagħrfu l-iżbalji tagħna, nitgħallmu minnhom biex din is-sena ma nerġgħux nagħmluhom.
Fuq livell ta’ partit politiku
Matul is-sena l-oħra, il-Partit Nazzjonalista kompla jagħmel passi kbar biex jerġa’ jqum fuq saqajh. Dan mhux biss fl-istrutturi u fil-finanzi tiegħu imma fil-kredibbiltà tiegħu. Il-PN għamel l-isforzi ġenwini tiegħu biex jerġa’ jkun viċin in-nies. U għaliex kien viċin in-nies, il-PN reġa’ qiegħed isemma’ leħnu fuq temi li qegħdin jitkellmu dwarhom in-nies. Tkellem fuq il-korruzzjoni fil-pajjiż, it-traffiku, l-ambjent, iż-żieda tal-fuel, il-power station li għadha ma saritx u tmexxija bla għaqal.
Għalkemm huwa fid-dmir u d-dritt li l-partit jagħmel loppożizzjoni kostruttiva, matul is-sena l-oħra l-PN kien proattiv. Ħareġ diversi dokumenti, proposti u ppropona diversi liġijiet ġodda fil-Parlament. Dan juri mhux biss l-għaqal tat-tmexxija ta’ Simon Busuttil u t-tim kollu, imma juri maturità kbira ta’ partit li fl-Oppożizzjoni, xorta qiegħed jagħmel differenza fit-tmexxija politika.
Matul din is-sena, il-PN għandu ħafna aktar x’jagħmel. Hija l-aħħar sena ta’ qabel l-elezzjoni. Għaldaqsant irridu naħdmu aktar. Bħala Viċi Sindku u bħala Kandidat qiegħed nagħmel ħilti biex nagħmel il-house visits u niltaqa’man-nies. Nemmen li dan huwa l-uniku mod kif nistgħu nkomplu nkunu viċin innies. L-appell tiegħi huwa wieħed: Ejjew ilkoll naħdmu flimkien biex flimkien naslu!
Fuq livell ta’ nazzjon
Nemmen bis-sħiħ li s-sena l-oħra kienet annus horribilis, mhux daqstant għall-Gvern Laburista daqskemm għall-pajjiż. Għalkemm ekonomikament il-pajjiż kompla fit-triq it-tajba li kellu fis-snin li għaddew, l-2016 kienet immarkata bi skandlu wara ieħor. Jekk matul it-tmexxija ta’ Mintoff ma kinitx tgħaddi ġimgħa li ma kienx jinqala’ xi ġlied, bil-Gvern Laburista ta’ issa ma tgħaddix ġimgħa li ma nisimgħux fuq xi skandlu.
Mhux biss kellna l-iskandli imma donnu l-entitajiet pubbliċi spiċċaw każini Laburisti. Biżżejjed naqraw li diversi diretturi u CEOs laħqu mingħajr kwalifiki jew sejħiet pubbliċi. Il-Korptal-Pulizija u l-Armata, il-PBS, l-Awtorità tal-Ippjanar, il- Housing u diversi entitajiet oħra kollha spiċċaw l-id tal-Partit Laburista.
Fl-2016 donnu l-poplu kompla jinsa l-għeruq tal-identità tiegħu u qiegħed ikompli jwarrab dawk il-valuri li huma l-pedament tan-nazzjon tagħna. Matul is-sena l-oħra kellna żieda ta’ mwiet, tqil, serq, vjolenza domestika, vandaliżmu u ħwejjeġ oħra li jħammrulna wiċċna. Donnu l-akbar valur sar biss il-flus u l-qligħ diżonest.
Bħala ċittadini attivi nagħmlu tajjeb li ma nibqgħux indifferenti u naċċettaw kollox. Ma jistax ikun li bħala ċittadini nagħlqu għajnejna jew inkella nibżgħu nsemmgħu leħinna. Jekk nagħmlu dan, allura nkunu kompliċi.
Filwaqt li nittama li nsibu l-ħin meħtieġ biex nagħmlu l-kontijiet tal-ħajja, nawgura li din is-sena tkun mimlija risq u barka għal kulħadd.
(Dan l-artiklu ġie ippublikat fuq il-gazzetta Il-Mument – 1 ta' Jannar, 2017)
Comentarios