Għandna bżonn politika u l-politiċi li jagħtu improtanza aktar lill-argumenti u lis-sustanza tal-ħsieb! Proprju għalhekk nemmen li Malta jistħoqqilha lil Simon Busuttil.
Tom u Jerry huma żewġ karattri famużi li jinsabu fil-filmati animati. Ilkoll xi darba rajniehom! Tom huwa l-qattus waqt li Jerry huwa l-ġurdien. Dawn huma kontinwament f’kompetizzjoni flimkien. It-tnejn li huma dejjem jippruvaw jaraw kif se jaqbdu jew ipattu lillieħor. Donnhom jinsabu f’pika li ma tispiċċax. Dejjem iggranfati ma’ xulxin.
Xi drabi nħoss li l-politika Maltija u l-partiti politiċi tagħna huma bħal Tom u Jerry. Donnhom iż-żewġ partiti politiċi tagħna dejjem fi ġlieda eterna ma’ xulxin. Daqqa jirbaħ wieħed. Daqqa jirbaħ l-ieħor! Meta partit politiku jagħmel punt jew kritika, fil-pront tara mill-ewwel il-partit l-ieħor jwieġeb bil-punt tiegħu! Dan jidher li ma jiġrix biss fuq livell ta’ partit imma anke fuq livell ta’ mexxejja politiċi, deputati, kandidati u saħansitra fuq livell ta’ ċittadini.
Fil-qosor, qisu l-Partit Laburista u l-Partit Nazzjonalista huma dejjem f’taqbida ma’ xulxin! Għalkemm nifhem li fir-realtà u fid-diskussjoni politika hemm ċerti differenzi ta’ ħsieb u ideat (għalhekk hemm u hawn partiti differenti), inħoss li din ‘il-pika eterna’ mhux biss mhix qiegħda tagħmel ġid lill-istess politiċi u tbiegħed lil ċerti nies mill-politika, imma fir-realtà din mhix il-politika vera li tfittex il-ġid komuni tas-soċjetà.
L-ironija hija li ċ-ċittadini donnhom jistennew u jippretendu li l-politika u l-politiċi għandhom ikunu bħal Tom jew bħal Jerry! Donnu ċerti ċittadini għandhom f’moħħhom li politiku tajjeb u allura li ta’ min wieħed jafdah huwa dak li jgħajjat, isabbat, jirrabja u jitmasħan. Din mhix politika imma teatrin. Nemmen li għandna bżonn politiċi ta’ stoffa u mhux prima donne!
Inżomm li l-politiku matur huwa dak li jkun meqjus fi kliemu u għemilu. Politiku matur huwa dak li għandu argumenti tajbin, kemm kapaċi joffri soluzzjonijiet tajbin, kemm huwa politikament onest u kemm verament għandu għal qalbu l-ġid komuni.
Il-Partit Laburista u Joseph Muscat irnexxielhom jagħmlu kampanja ta’ marketing kbira. Joseph Muscat wiegħed il-ġenna fl-art lil kulħadd. Tliet snin wara kull min juża moħħu jaf li l-kliem kollu li ntqal dwar il-meritokrazija, l-akkontabbiltà, it-trasparenza, il-korruzzjoni u tant kliem sabiħ ieħor huwa biss kliem fieragħ u vojt.
Ilkoll nafu li l-Partit Laburista daħak waħda sew bil-poplu. Għaldaqsant, dan għandu jiftħilna għajnejna biex naraw li ma nippressjonawx ruħna mill-politika u millpolitiċi li jxejru jdejhom jew li jsabbtu saqajhom.
Għandna bżonn politika u l-politiċi li jagħtu importanza aktar lill-argumenti u lis-sustanza tal-ħsieb! Proprju għalhekk nemmen li Malta jistħoqqilha lil Simon Busuttil. Simon Busuttil mhuwiex bniedem li jsabbat, jgħajjat, aggressiv jew li jilgħab quddiem il-kamera ta’ televixin! Simon Busuttil huwa persuna edukata, kalm u għandu ċerta loġika ta’ ħsieb. Huwa proprju dan l-istil ta’ politika li mhux biss jien stess nixtieq li jkolli bħala kandidat imma għandna bżonn dan jekk ma rridux nibqgħu bil-politika skaduta ta’ Tom u Jerry!
Minn diversi żjarat li nagħmel fid-djar tan-nies dan qiegħed joħroġ biċ-ċar. Iċ-ċittadini tagħna, b’mod partikolari dawk li għandhom ċertu livell ta’ edukazzjoni, huma mxebbgħin sa mneħirhom bil-politika tat-teatrini. Il-ġenerazzjoni l-ġdida ta’ dawk li jistgħu jivvutaw u dawk ta’ bejn 20 u 28 sena mhumiex biss diżappuntanti imma hemm ukoll riskju kbir li fl-elezzjoni li ġejja ma joħorġux jivvutaw.
Għalkemm il-politiċi preżenti u l-partiti politiċi jafu b’dan, mhuwiex qed isir sforz ġenwin biżżejjed biex ikun hemm din il-bidla. Sfortunatament, hawn ukoll midja soċjali li l-għan ewlieni tagħha huwa biss biex tagħti palata ħalli Tom jagħti ‘daqqa’ lil Jerry u viċi versa. Għalkemm il-politika hija sfida ta’ ħsibijiet, ma nemminx f’din it-tip ta’ politika. Il-politika hija dwar il-ġid komuni u kif nistgħu nagħmlu s-soċjetà aħjar u mhux politika ta’ teatrin! L-enfasi ma għandux ikun biss fuq id-dehra imma fuq is-sustanza tal-ħsieb.
Jien u kandidati oħrajn sħabi dħalna fil-politika mhux biex inkunu bħal Tom jew bħal Jerry. Lanqas ma dħalna fil-politika biex noqogħdu l-ġurnata kollha nikkritikaw lill-Partit Laburista. Għalkemm li wieħed jagħmel il-kritika hija parti mill-ħidma ta’ kull politiku, iċ-ċittadini mhux biss jivvutaw skont kemm ‘l-oħrajn huma ħżiena’ imma wkoll fuq ‘kemm aħna tajbin’ u qed noffru soluzzjonijiet għall-ġid komuni.
Nistieden lil kulħadd li jekk verament inħobbu lil pajjiżna u jekk verament dħalna fil-politika biex nagħtu servizz lill-komunità, nieqfu nagħmlu l-politika ta’ Tom jew ta’ Jerry! Din hija politika skaduta! Malta jistħoqqilha aħjar!
(Dan l-artiklu ġie ippublikat fuq il-gazzetta Il-Mument – 15 ta' Jannar, 2017)
Comments