Hija t-tama li bħala poplu Malti nimmaturaw politikament u ma nibqgħux inqisu l-politika u l-partiti politiċi bħal donnhom klabb tal-futbol li jirbaħ jew le, nibqgħu nżommu miegħu sal-aħħar. Wasal iż-żmien li nagħżlu bejn politiku u ieħor!
F’dawn l-aħħar ġranet, miet il-Prinċep Philip, id-Duka ta’ Edinburgh. Il-mewta tal-Prinċep Philip hija opportunità li tfakkarna li l-mewt tasal fuq kulħadd.
Wieħed jista’ jgħid li l-mewt hija l-aktar ħaġa demokratika li hawn. Ma tara wiċċ ħadd. Ma tagħmel preferenza ma’ ħadd, lanqas ma’ min huwa sinjur jew potenti. Il-mewt hija verament soċjalista! Tqis lil kulħadd l-istess u Ħadd wara Ħadd ser tasal għand kulħadd.
Għalfejn qed ngħid dan? Qiegħed ngħid dan għaliex għalkemm il-kultura tagħna tbeżżagħna mill-mewt u tipprova tagħmel minn kollox biex tnessina minn din ir-realtà, propju l-mewt turina biċ-ċar li qabel ma din tasal, aħna għandha ħajja x’ngħixu! Il-mewt tiġi biss wara l-ħajja li nkunu għixna! Għaldaqstant, il-mewt tfakkarna li qabel ma tħabbat fuq il-bieb tagħna, aħna ġejna mogħtija l-opportunità li ngħixu! Din hija opporunità ta’ darba. Ma terġax tiġi. Huwa fatt xjentifiku li l-mewt ma ġġibx il-ħajja umana imma hija l-ħajja umana li twassal għall-mewt.
Fi kliem sempliċi, wieħed għandu ħajja x’jgħix qabel ma jmut!
Żewġ għażliet fundamentali
Quddiem dan id-don tal-ħajja wieħed għandu żewġ għażliet fundamentali x’jagħmel.
L-ewwel għażla hija li wieħed jaħli ħajtu fix-xejn u jirraġuna, kif jgħid il-qawl Malti: “kul u tpaxxa għaliex minn hawn għal ġol-kaxxa’! Min jirraġuna b’dan il-mod, ikun mhux biss jara sal-ponta ta’ mnieħru imma ħafna drabi jispiċċa jkun persuna egoista, ma jimpurtah minn xejn u minn ħadd. Persuna bħal dan jaħseb li huwa ċ-ċentru tal-univers u li kollox qiegħed għalih u għall-interessi tiegħu. Dan iwasslu biex jaqa’ u jqum minn loħrajn u jaħseb għalih u għall-interessi tiegħu biss. Dan juri mhux biss bil-kliem imma anke f’għemilu u fid-deċiżjonijiet li huwa jwettaq. Sfortunatament, anke għalih il-politika hija biss mezz biex jara kif ser jakkwista u jieħu minn fuq ħaddieħor! L-esperjenza wrietni li min huwa b’din il-mentalità huwa l-aktar persuna li jibża’ mill-mewt. Jafu li bil-mewt, l-arja u l-arroganza tagħhom ser tispiċċa fix-xejn!
It-tieni għażla hija li quddiem ir-realtà tal-mewt, wieħed jaf li jiemu huma magħduda. Jaf li huwa jinsab ħawn b’ċens temporanju. U għaliex jaf li jiemu huwa sa massimu ta’ 99 sena jew inqas, jagħmel ħiltu biex kuljum jaħdem biex ħajtu tkun opporunità ta’ ġid għalih u għal ħaddieħor. Din il-mentalità twassal biex persuna, filwaqt li jieħu ħsieb tiegħu nnifsu, fl-istess ħin iħoss li huwa parti minn komunità. Flimkien jaħdmu għal soċjetà aktar ħanina, ġusta u b’inqas tbatija. Fil-qosor, jipprova jagħmel ħiltu biex is-soċjetà ta’ madwaru tkun ferm aħjar milli hija.
Ir-rwol tal-politiku
U hawn jidħol ir-rwol tal-politiku. Il-politiku li jagħżel l-ewwel għażla, huwa politiku li jaħtaf il-poter għalih innifsu. Għalih il-poter isir il-mezz kif jista’ jsir sinjur minn fuq id-dahar il-poplu. Għalih, il-politika hija biss opportunità biex jinqeda aktar milli biex jaqdi. Dan it-tip ta’ politiku jemmen fil-politika bl-ittra ‘p’ żgħira, jiġifieri politika partiġjana li tkeskes u xxewwex għaliex fil-firda tinsab ir-rebħa.
Min-naħa l-oħra, il-politiku li jagħżel it-tieni għażla, huwa politiku tal-valuri. U politiku bil-valuri jfisser li huwa persuna fejn il-prinċipji jiġu l-ewwel qabel il-voti u l-popolarità. Ifisser li bħala politiku ser jaħdem mhux għall-interessi tal-ftit imma tal-ġid komuni. Dan it-tip ta’ politiku huwa persuna ta’ integrità kbira u juża l-ħin politiku tiegħu/tagħha biex ikunu megħjuna ta’ madwaru, biex jimxu ’l quddiem.
Għaldaqsant, huwa politiku li jaħdem qattigħ għal soċjetà aktar ħanina, umana u ġusta. Dan it-tip ta’ politiku huwa persuna li ma jistax jissaporti li jara l-inġustizzja jew il-korruzzjoni quddiem għajnejh, għaliex jaf li dawn huma s-susa tas-soċjetà b’saħħitha. Dan iwassal biex isemma’ leħnu mingħajr biża’. Jaf li jiemu huma magħduda u allura m’għandux ħin x’jaħli fil-vojt. Il-ħidma tiegħu hija missjoni li jkun forza għat-tajjeb u għall-ġid.
Nistieden lil qarrejja mhux biss jidħlu daħla fihom infushom u jaraw x’għażla personali għamlu huma quddiem il-valur tal-ħajja, IMMA u hawn hija l-imma kollha, min huma l-poltiċi li għandna u liema għażla tal-ħajja huma għamlu. L-ewwel jew it-tieni għażla?
Nimmaturaw politikament
Hija t-tama li bħala poplu Malti nimmaturaw politikament u ma nibqgħux inqisu l-politika u l-partiti politiċi bħal donnhom klabb tal-futbol li jirbaħ jew le, nibqgħu nżommu miegħu sal-aħħar. Wasal iż-żmien li nagħżlu bejn politiku u ieħor!
Fl-istess waqt, il-mewt turina biċ-ċar il-bżonn li nkunu umli fil-ħidma politika tagħna.
Tajjeb li niftakru f’dak li jgħid qawl Taljan: Quando finisce la partita, i pedoni, le torri, i cavalli, i vescovi, i due re e le due regine tutti vanno nello stesso scatolo. Bil-Malti: Meta l-logħba ta’ chess tispiċċa, it-torri, iż-żwiemel, l-isqfijiet, ir-rejiet u r-reġini jispiċċaw ilkoll fl-istess kaxxa!!
Hekk hu!
(Dan l-artiklu ġie ippublikat fuq il-gazzetta Il-Mument – 25 t'April, 2021)
Comments