Jekk verament il-Gvern irid iġib fostna turisti ta’ kwalità kif iħobb jgġid, allura jrid jinvesti ferm aktar fl-infrastruttura.
San Ġiljan u Tas-Sliema huma żewġ lokalitajiet marbutin sew mat-turiżmu. Mhux biss huma l-mekka tad-divertiment, imma anke għall-fatt li ġewwa dawn il-lokalitajiet jinsabu diversi lukandi u akkomodazzjonijiet oħra għat-turist.
It-turist meta jiġi jżurna mhux biss imur iżur għal ftit sigħat ċertu lokalitajiet bħall-Imdina, imma jgħix f’dawn il-lokalitajiet. Hemm differenza fuq l-impatt li jħalli fuq l-infrastruttura pubblika turist li jżur lokalità u hemm impatt li jħalli turist li jkun qiegħed jgħix matul il-mawra tiegħu/tagħha. Dan ifisser li l-infrastruttura f’San Ġiljan u Tas-Sliema jrid ikollha aktar investiment.
Investiment privat u dak pubbliku
Għalkemm fil-lokalitajiet ta’ San Ġiljan u Tas-Sliema, is-settur privat għamel diversi investimenti u hemm diversi proġetti ta’ kwalità bħalma huma numru ta’ lukandi sbieħ, imma wasalna għal SATURATION POINT. Nistgħu nkomplu nibnu u nibnu aktar meta l-istudju jindika li għandha oversupply ta’ lukandi? Il-lokalità tiflaħ aktar żvilluppi enormi kif hemm propost?
Għal darba oħra nwassal li hemm bżonn urġenti li jkollna master plan mhux kif kellna, li kienet bħal donnu shopping list. Il-master plan li qed nirrerferi għalih huwa dak li jiġbor lill-istakeholders kollha u naraw kif din il-lokalità, li hija meqjusa bħala l-GOLDEN GOOSE, ma tispiċċax bħal donnha FAVELA, jiġifieri depressed area.
It-turisti ta’ kwalità jridu ambjent ta’ kwalità.
Għalkemm il-privat jinvesti bil-kbir, sfortutnament il-Gvern mhuwiex qed jinvesti fl-infrastruttura pubblika. Filwaqt li għandha lukandi 5 star, għandha infrastruttura pubblika 1 star. Għandha bankini 1 star, għandha toroq 1 star u soft areas 1 star! Issa, għaliex ma sarx investiment mill-Gvern fuq l-infrastruttura ta’ dranaġġ. Qed ikun hemm żbroffi ta’ dranaġġ fil-baħar tal-madwar! Sfortunatament il-Gvern abbanduna dawn il-lokalitajiet.
F’diversi mistoqsijiet parlamentari li għamilt, staqsejt l-ammont ta’ investimenti li sar matul l-2022 f’dawn il-lokalitajiet. Fit-tweġiba tiegħu l-Ministru qali li filwaqt li f’lokalitajiet oħra bħal Mellieħa/San Paul intnefqu madwar nofs miljun ewro f’upgrading u refurbishmnets, f’San Ġiljan intnefqu biss €20,000 u f’Tas-Sliema intnefqu €10,000!
Filwaqt li ma għandi l-ebda diffikultà li jintnefqu flus f’lokalitajiet oħra, imma ma nistgħux inżarmaw knisja biex naramaw oħra!
Il-wiċċ vili huwa li għal dan in-nuqqas ta’ investiment jeħel il-Kunsill Lokali, li ma jistax jagħmel proġetti ta’ tisbiħ, imma huwa kontinwament firefighting mal-vandaliżmu fil-lokalità u mal-ħsarat li ċertu cowboys fil-kostruzzjoni jagħmlu lil infrastruttura pubblika!
Eco tax li jħallas it-turist
Fil-proposta tiegħu l-Partit Nazzjonalista tenna li mill-ECO Tax – jiġifieri mit-taxxa ta’ 50ċ li jħallas it-turist għal kull lejl – perċentaġġ minnha tmur għand il-Kunsill biex dan ikun marbut li jinvestihom fl-upgrading u tisbiħ!
Din hija win win situation mhux biss għal Kunsill, imma anke għall-MHRA li naf li jilmentaw bin-nuqqas ta’ investiment fl-infrastruttura pubblika!
Nagħmel referenza għal PQ 7841 fejn tlabt lill-Ministru jgħid din l-eco tax – li hija madwar €7 miljuni – fejn qegħdin imorru dawn il-fondi.
Niskopri li dawn il-fondi qegħdin imorru BISS fid-distrett ta’ min ikun Ministru tal-Turiżmu! L-ewwel marru fid-distrett ta’ fejn kien joħorġ Konrad Mizzi, u mbagħad ta’ fejn toħroġ Julia Farrugia, u ISSA ġewwa d-Distrett tal-Ministru Bartolo!
Min-naħa l-oħra, dawn f’San Ġiljan/Paceville – li hemm l-aktar numru ta’ lukandi – ġiet mogħtija biss lgħaqa tarmac fi Triq Paceville biex donnu jagħlqilna ħalqna!
Filwaqt li nerġa’ ninsisti li m’għandi l-ebda diffikultà, imma l-Ministru ma jistax juża fondi pubbliċi u enitajiet pubbliċi biex jieħu ħsieb id-distrett tiegħu.
Inħeġġeġ ukoll lill-MHRA biex fid-dawl li hija wkoll għandha rapprezentanza fuq dan il-bord tal-fondi, jaraw li jintnefqu propju biex ikomplu jsebħu l-madwar ta’ diversi lukandi li hawn f’din il-lokalità.
Ejjew ma narawx sal-ponta mniħirna u ma nkomplux inġibu l-ġebla fuq saqajna, aktar u aktar meta hemm kompetizzjoni kbira biex jinġiebu t-turisti. Ma jistax ikollna biss turist li jiġi fostna darba biss u jaħlef li ma jerġax jiġi għaliex spiċċa f’sit ta’ kostruzzjoni jew f’ambjent mitluq!
Ma jistax ikollna infrastruttura 1 star jekk iridu nġibu turisti ta’ kwalità. Jekk verament il-Gvern irid iġib fostna turisti ta’ kwalità kif iħobb jgħid, allura jrid jinvesti ferm aktar fl-infrastruttura pubblika f’dawn il-lokalitajiet.
(Dan l-artiklu ġie ippublikat fuq il-gazzetta Il-Mument – 11 ta' Ġunju, 2023)
ความคิดเห็น