X’hemm komuni bejn San Ġwann, Swieqi, Gzira u l-Imsida?
Għalkemm dawn il-lokalitajiet għandhom rejaltajiet differenti minn xulxin IMMA għandhom xi ħaga komuni bejniethom. Għandu l-għassa tal-pulizija magħluqa! Dawn l-għasses huma għal divesi xhur jew saħansitra snin magħluqa!
Għalkemm naf li hawn lokalitajiet oħra li għandhom l-għassa magħluqa imma dawn il-lokalitajiet li semmgħet huma lokalitajiet mhux biss li kibru fil-popolazzjoni imma anke għandhom diversi sfidi serji.
Fil-fatt, jekk wieħed jagħti titwila lejn l-istatistika jara li f’dawn l-aħħar 35 sena kien hemm żieda kbira fil-popolazzjoni ta’ dawn il-lokalitajiet.
Per eżempju, skont ic-census li kien sar fi 1985 u dak ta’ 2021 (l-aħħar wieħed li sar), il-lokalita’ ta’ San Ġwann kibret minn 8,117 għal 14,244 persuni jgħixu hemm. L-Imsida, fis-sena 1985 kien hemm 6,219 persuni jgħixu filwaqt li fi 2021 żdied għal 13,587. Ġewwa l-Gżira, fiċ-census ta’ 2021 kien hemm 10,331 persuna meta f’dak ta’1985 kien hemm 8,471 persuni. Minn naħa l-oħra, ġewwa s-Swieqi minn 6,721 tela’ għal 13,044 persuni.
Dan kollu wasal biex dawn il-lokalitajiet imbiddlu u ma baqgħux lokalitajiet kwieti kif forsi kienu. Is-sens ta’ komunita’ intilef ħafna. Personalment, jiena jgħixt u ħdimt għal divesi snin ġewwa San Ġwann, u allura naf kif kien u naf kif inhu llum!
Dan kollu wassal biex f’dawn il-lokalitajiet hemm diversi kwistjonijiet ta’ serq, vandaliżmu, tensjoni etniċi, ġlied, teħid ta’ droga fl-apert, skart maħruġ barra l-iskeda u/jew mormi barra, storbju, żieda ta’ traffiku, vetturi parkeġġjati ħażin u mġieba mhux xierqa fost oħrajn.
Dan qiegħed iwassal biex diversi familji, b’mod partikolari dawk li għandhom it-tfal u anke persuni anżjani, qegħdin iħossu nuqqas ta’ sigurta. Diversi qegħdin jilmentaw li mhux l-ewwel drabi li jibżgħu jgħaddu minn ċertu toroq jew inkella joħorġu filgħaxija!
Fil-qosor: diversi familji jħossuhom mhux siguri f’darhom stess!
Għaldaqstant, fid-dawl ta’ dan kollu ma nistax nifhem l-intenzjoni tal-Ministru Byron Camilleri u tal-Kummissarju tal-Pulizija Angelo Gafa’ biex dawn jibqgħu jinsistu li jżommu l-għasses ta’ dawn il-lokalitajiet magħluqa!
Kieku dawn il-lokalitajiet huma lokalita’ żgħira u kwieta, bħal ma hija l-Imdina, nifhem IMMA dawn il-lokalitajiet huma ferm busy! L-ironija hija li filwaqt li għassa ta’ l-Imdina hija miftuħa (u tajjeb li hija miftuħa), ir-residenti ta’ dawn il-lokalitajiet li qed insemmi jridu jinqdew mill-għassa ta’ San Ġiljan jew inkella dik ta’ Tas-Sliema!!
Issa kulħadd jaf li dawn iż-żewġ għasses huma diġa’ mhumiex ilaħqu mal-ħidma li huma għandhom minħabba li kemm l-għassa ta’ San Ġiljan u dik ta’ Tas-Sliema għandhom diversi sfidi ta’ buon ordni! Dan mhux lanqas ġust fuq il-pulizija li jservu f’dawn l-għasses, aktar u aktar meta Paceville tiddependi fuq l-għassa ta’ San Ġiljan!
Għalkemm diversi drabi ġibt l-attenzjoni ta’ dan kollu u saħanistra dan l-aħħar saret konferenza stampa flimkien mal-kollega tiegħi Onor. Darren Carrabot u mas-sindki/minority leaders ta’ dawn il-lokalitajiet fejn tlabna li dawn l-għasses jinfetħu, il-Gvern wieġeb li filwaqt li numru ta’ dawn l-għasses qegħdin ikunu refurbished (San Gwann ilha kwazi sentejn!), hemm il-puliżija tal-komunita’!
Filwaqt li huwa vera li hemm dan is-serviżż imma dan huwa servizz limitat. Per eżempju, il-puliżija tal-komunita’ ma tkunx hemm filgħaxija! Xi drabi wkoll wieħed ma jistax isibhom, lanqas jekk jipprova jfittxhom b’nemes! Filwaqt lis-servizz tal-pulizija tal-komunita’ kien pass tajjeb, għaliex waħda teskludi l-oħra?
Filwaqt li nifhem li hemm nuqqas ta’ risorsi umani, nifhem ukoll li l-Gvern irid allura jinvesti aktar! Ma jistax il-Gvern igħid li ma hemmx fondi għaliex fejn irid il-Gvern isib il-fondi! Nemmen li din mhiex kwistjoni ta’ fondi imma ta’ politika li tneħħi l-funzjoni tal-għasses.
Ninsab ċert li diversi residenti f’dawn il-lokalitajiet u oħrajn filwaqt li japprezzaw li jkun hemm pulizija fil-komunita’, tant ieħor japprezza li jkun hemm għassa miftuħa li sservi bħala serħan ta’ moħħ u punt ta’ riferiment ta’għajnuna f’kaz ta’ bżonn!
F’isem ir-residenti qiegħed nitlob li dawn l-għasses jinfetħu mill-ġdid.
Ir-residenti tagħna jixriqielhom aħjar!
(Dan l-artiklu ġie ippublikat fuq newsbook.com.mt – 8 t' Ottubru, 2024)
Comments