Nemmen bis-sħiħ li meta nagħżlu l-politika tal-valuri, il-partit tagħna jkompli jgawdi l-fiduċja li tista’ twassalna biex ingawdu l-fiduċja tat-tmexxija ta’ pajjiżna!
Fl-aħħar Kunsill Ġenerali li nżamm il-Ħadd li għadda [12 ta’ Frar] kelli l-opporunità li nindirizza l-istess Kunsill. It-tema tal-Kunsill kienet: Politika ta’ Fiduċja.
Dan huwa l-isem ukoll tad-dokument li ħareġ il-Parit Nazzjonalista għal dan il-Kunsill Ġenerali. F’dan id-dokument hemm espressjoni profonda u li fuqha ħassejt li għandi nagħmel ir-riflessjoni tiegħi: ‘Il-kwalità tal-ħajja hu l-qalb dejjem tħabbat tal-PN’.
Nemmen bis-sħiħ li dan huwa l-għan aħħari tal-politika: il-kwalità tal-ħajja. Imma meta wieħed jitkellem fuq il-kwalità tal-ħajja, dan qiegħed jitkellem fuq il-kwalità tal-ħajja personali tiegħu jew inkella fuq il-kwalità tal-ħajja tagħna lkoll?
Qiegħed nistaqsi għaliex jekk nagħmlu politika marbuta mal-interessi tal-‘ftit’, allura l-kwalità tal-ħajja titjib biss għal dawk il-ftit. Issa, ilna naraw dawn il-‘ftit’ jittejbu l-kwalità ta’ ħajjithom bl-għajnuna tal-Gvern Laburista filwaqt li oħrajn baqgħu lura. Tajjeb li niġbet l-attenzjoni li huwa l-istess Ministru Clyde Carauna li ammentta li hawn 134,662 ħaddiem full-time u 16,155 persuna part-time jew full-time reduced li jaqilgħu anqas mill-paga medja ta’ €20,099 u dan qabel it-taxxa, jiġifieri wieħed irid iħallas €2,564 f’taxxi (rata ta’ persuna weħidha) u madwar €2,100 f’bollol. Dan ifisser li filwaqt hemm min qiegħed jiffanga €13,000 fix-xahar (kif ħabbar dan l-aħħar l-Ministru Caruana għal ‘kunsulent’ fl-AirMalta), dawn il-ħaddiema jieħdu d-dar €15,435 fis-sena! X’inġustizzja soċjali!
Politika tal-ġid komuni
Għalkemm il-kwalità ta’ ħajti/ħajtek huma mportanti, il-politika vera hija ‘DWARNA’, fejn il-kliem ‘int’ u ‘jien’ jinbidlu f’kultura ta’ ‘AĦNA’. Dan jissejjaħ il-ġid komuni.
Meta nagħmlu politika favur il-ġid komuni nkunu verament qed intejbu l-kwalità tal-ħajja tagħna lkoll.
Imma l-ġid komuni għandu bżonn numru ta’ valuri li jwieżnuh u jsostnuh. Kif xkora vojta ma żżommx weħidha, hekk ukoll il-ġid komuni. Dan ifisser li rridu nagħmlu pass ieħor u nitkellmu fuq politka tal-VALURI.
Għalkemm hemm numru ta’ valuri li nixtieq insemmi, ser nitkellem fuq żewġ valuri li nemmen li huma l-aktar fundamentali.
Il-valur tal-ambjent
L-ambjent huwa d-dar komuni tagħna. L-ambjent huwa l-futur tagħna. Hija r-responsabbiltà tagħna lkoll li l-ambjent ngħożżuh u nibżgħu għalih. Il-Profs Herbert Ganado kien kiteb ‘Rajt Malta tinbidel’. Mill-ġdid, Malta, l-irħula u l-ibliet tagħna qegħdin jinbidlu u jitilfu l-identità storika tagħhom. L-ambjent jinsab taħt assedju ieħor.
Din id-darba dan l-assedju mhux mit-Torok IMMA minn numru żgħir ta’ dawk li waqt li qegħdin itejbu sew il-kwalità ta’ ħajjithom, qed jagħmlu dan għas-spejjeż tagħna lkoll. Għaldaqstant, huwa fl-interess tagħna li naraw li dan ma jibqax iseħħ!
L-ambjent huwa wkoll it-tibdil tal-klima, is-sbuħija tal-kampanja, tinġis tal-baħar u l-imħabba lejn l-annimali KOLLHA, inkluż l-għasafar ukoll!
Min huwa favur l-ambjent ma jistax ikun selettiv u jagħżel x’jaqbillu, donnu qiegħed f’xi supermarket, pick and choose!
L-ambjent huwa pakkett wieħed.
Il-valur tal-inklużjoni u ġustizzja soċjali
Ħadd ma għandu jibqa’ lura. Għaldaqstant, għandha nħaddnu politika li tinkludi u mhux teskludi. Id-dinjità umana ma għandhiex kulur tal-ġilda, status soċjali, twemmin jew orjentazzjoni sesswali. Ilkoll bnedmin b’dinjità umana.
Il-ħajja hija sagra mhux biss f’ġuf il-mara imma dejjem u kullimkien, anke meta tkun qed titqalleb fil-mewġ tal-Mediterran!
In-nuqqas ta’ inklużjoni jfisser meta wieħed ipaxxi lil ħafna u jwarrab lil ftit. Dan iġib l-inġustizzja soċjali. U l-inġustizzja hija oħt il-korruzzjoni. Ma tgħaddix ġurnata li mhux qed nisimgħu bi stejjer ta’ korruzzjoni.
It-triq ’il quddiem
Jekk Il-PN irid jgħix rebbiegħa oħra, allura jrid ikollu l-kuraġġ u determinazzjoni li jkun il-vuċi assertiva u xhud onest ta’ dawn iz-zewġ valuri li semmejt.
Aktar u aktar meta ironikament dawn iż-zewg valuri huma valuri li jemmnu fihom 23% tal-Maltin li qalu li ma jridux s’issa jipparteċipaw aktar fil-ħajja politika ta’ pajjiżna.
Nemmen bis-sħiħ li meta aħna nagħżlu l-politika tal-valuri jista’ ikollna mhux biss ‘politika ta’ fiduċja’, imma li l-partit tagħna jkompli jgawdi l-fiduċja li tista’ twassalna biex ingawdu l-fiduċja tat-tmexxija ta’ pajjiżna!
Din hija t-triq tagħna ’l quddiem.
Kuraġġ!
(Dan l-artiklu ġie ippublikat fuq il-gazzetta Il-Mument – 19 ta' Frar, 2023)
Comments