Nixtieq insarraf il-fiduċja murija f'ħidma siewja lill-komunità.
Lulju huwa xahar li ħalla diversi marki f’ħajti. Matul dan ix-xahar seħħew diversi ġrajjiet importanti f’ħajti. Kien l-10 ta’ Lulju meta kont mort il-Kenja. Kienet esperjenza li laqqgħetni ma’ realtajiet li qatt ma ħlomt bihom. Kien l-14 ta’ Lulju tal-1989 meta kont ġejt ordnat saċerdot Kapuċċin, esperjenza li żgur ħalliet marka kbira f’ħajti u tatni opportunità tad-deheb biex inkun ta’ servizz. U kien proprju fit-28 ta’ Lulju wkoll li żżewwiġt lil marti wara li kont ħadt id-deċiżjoni li naqleb paġna ġdida u nibda kapitlu ġdid. Għaliex qiegħed ngħid dan? Proprju fil-5 ta’ Lulju li għadda ġejt maħtur uffiċjalment bħala l-ħames sindku f’San Ġiljan wara li fl-aħħar leġiżlatura kont viċi sindku.
Nemmen li dan huwa kapitlu ġdid f’ħajti. Nixtieq insarraf ilfiduċja murija f’ħidma siewja lill-komunità.
San Ġiljan joffri diversi opportunitajiet sbieħ u huwa lokalità mfittxija ħafna. Fl-istess waqt nistqarr li din lokalità li toffri sfidi kbar li mhux faċli li wieħed isib tarf tagħhom. Dan ġej mill-fatt li hawn diversi fatturi f’kompetizzjoni diretta ma’ xulxin. Kulħadd jara l-kantuniera tiegħu u kulħadd irid iħarisha bis-sħiħ.
Minn naħa waħda hawn ir-residenti li jridu jgħixu ħajjithom filġabra ta’ darhom, il-komunità kummerċjali li trid taħdem biex taqla’ l-għajxien tagħha u l-iżviluppaturi li jridu jkomplu jibnu biex isostnu n-negozju tagħhom. Min-naħa l-oħra, hawn it-turist (kemm Malti, kif ukoll dak barrani) li jiġi fostna biex jiddeverti. Sfortunatament, diversi drabi ma jinstabx il-bilanċ meħtieġ bejn dawn l-interessi varji. Għaldaqstant dan qed iwassal għal diversi problemi kbar u serji.
Kostruzzjoni bla rażan
Nistqarr li l-ikbar żewġ sfidi huma l-kostruzzjoni bla rażan u nnuqqas ta’ ndafa.
Ħadd mhu kontra l-iżvilupp. Dan iġib ċertu progress u diversi familji Maltin jiddependu minnu għall-għajxien tagħhom. Ħafna huma biss kontra l-iżvilupp bla rażan li qed iwassal biex kull kantuniera tispiċċa tkun mibnija u kull spazju meħud! Wara li Paceville ttieħed kollu għall-bini minn żvilupp enormi, issa l-iżviluppaturi dawru ħarsithom lejn parti qadima f’San Ġiljan. Min huwa midħla ta’ din il-lokalitá jaf sew x’qed ngħid. Dan qed iwassal għal diversi lmenti ta’ residenti li ma jistgħux jgħixu filkwiet u ħielsa minn inġenji u trakkijiet, u qed iwassal ukoll biex San Ġiljan jispiċċa zona waħda ta’ bini li se titlef kull identità li kellha. Il-parti antiki qiegħda fir-riskju li ssir bħal Paceville! L-ironija hija li l-Awtorità tal-Ippjanar, minflok qiegħda tipproteġi lil din il-parti antika ta’ San Ġiljan, qed tkun kompliċi f’dan it-tħassir ta’ dan il-patrimonju Ġiljaniż! Dan jista’ jħalli impatt ukoll fuq itturiżmu tagħna. Mhux l-ewwel darba l-istess turisti jilmentaw li huma ġew fostna biex igawdu btala u mhux biex joqogħdu qalb krejnijiet, storbju u bini!
Nuqqas ta’ ndafa
Sfida oħra hija n-nuqqas ta’ ndafa. Għalkemm il-Kunsill Lokali u anke l-Gvern Ċentrali qegħdin nagħmlu ħilitna, xorta jibqa’ lfatt li diversi persuni joħorġu ż-żibel tagħhom mhux fil-ħinijiet stabbiliti. Dan qed jiġri mhux daqstant mir-residenti permanenti imma minn dawk il-barranin li jikru appartamenti għal ftit jiem. Sfortunatament, għalkemm ikunu avżati, dawn xorta jagħmlu ta’ rashom.
Il-Prim Ministru stqarr li waħda mill-prijoritajiet tal-Gvern Lokali għandha tkun l-indafa. Filwaqt li naqbel perfettament miegħu, għandu bżonn iżomm kelmtu rigward il-GreenWardens. Proposta li kont għamilt hija li persentaġġ mill-bed tax li kull turist iħallas għal kull lejl li jgħaddi fostna tingħata lill-Kunsilli Lokali biex ikun hemm aktar fondi għal ġbir ta’ żibel u infurzar tal-liġi.
Barra minn hekk, hemm bżonn li tinbidel il-liġi tal-kera ta’ dawn l-appartamenti b’mod li s-sidien isiru responsabbli miżżamma tal-indafa. Hekk jiġri f’pajjiżi oħra.
Nixtieq fl-aħħar insellem mhux biss lill-ħames sindki li ġew magħżula qabli imma b’mod partikulari nirringrazzja lis-Sur Guido Dalli tal-ħidma siewja li wettaq matul iż-żmien li dam sindku. Ċert li d-dedikazzjoni tiegħu lejn San Ġiljan se tkompli flimkien mal-kunsilliera l-oħra.
Flimkien ma’ sħabi l-kunsilliera l-oħra qed inħares bl-umiltà imma b’determinazzjoni sħiħa għal dan il-kapitlu ġdid f’ħajti.
Flimkien naslu.
(Dan l-artiklu ġie ippublikat fuq il-gazzetta Il-Mument – 21 ta' Lulju, 2019)
Comentarios