Bħala sinjal ta’ protesta, jiena u numru ieħor ta’ sħabi deputati tfajna karti b’messaġġ kontra l-korruzjoni kemm fil-Parlament u kemm barra mill-Parlament.
Kemm tal-One u kemm id-deputati Laburisti tkażaw bina, saħansitra ġabu ritratt tiegħi nitfa’ l-karti ’l barra mill-Parlament!
Niskanta kemm hawn min huwa ipokrita. Mela hawn min tkaża u għajjarna li ħammiġna l-Kamra u l-Pjazza u dawn l-istess nies ma tkażawx li ħamġu lil Malta u lil isimha bi tħanżir u l-iffangar tagħhom. Pajjiżna ġabuh mandra sħiħa.
Qatt matul l-istorja politika ta’ pajjiżna ma kellna sitwazzjoni fejn Eks Prim Minstru, Eks Deputat Prim Ministru, Ministri u Segretarji Permanenti jispiċċaw jkunu akkużati għal ħasil ta’ flus, b’korruzzjoni u b’kollużjoni ma’ dawk li ffrodaw lil pajjiżna.
Iffrodaw lil pajjiż
Qiegħed nuża l-kliem “dawk li ffrodaw lil pajjiżna” mhux minn rasi. Infakkar li kellna żewġ sentenzi tal-Qorti u anke rapport tal-Awditur Ġenerali li mhux biss Vitals/Steward serqu/ffrodaw lil Malta €400 miljun imma li l-Istat Malti kien kompliċi ma’ din il-ħadma/serqa!
Sfortunatament, il-korruzzjoni hija waħda mill-watermark ta’ dan il-Gvern.
Filwaqt li ma għandi l-ebda problema nistqarr li dan il-Gvern wettaq miżuri tajbin imma l-korruzzjoni bidlet dan il-Partit Laburista f’dar tal-ħallelin u l-frodisiti.
Matul dawn il-ħdax-il sena kellna skandlu wieħed wara l-ieħor, wieħed aktar oxxen minn ieħor. L-aħħar wieħed kien l-iskandlu tal-benefiċċji soċjali fejn numru ta’ persuni bl-għajnuna ta’ dawk li huma fil-Gvern ħadu eluf minn ħalq ħaddieħor!
Liġi għall-allat
Irridu ninsistu lkoll li l-Liġi hija għal kulħadd. Ma għandhix Liġi għal allat u Liġi għalina. Ilkoll aħna ugwali quddiem il-Liġi. Dan huwa prinċipju fundamentli li ma nistgħux ma naċċettawhx.
Filwaqt li kulħadd huwa meqjus innoċenti sakemm hemm sentenza imma wieħed ma jistax fl-istess waqt joħrog jattaka lill-Qorti u jgħid li din mhiex ġusta!
X’jigri jekk il-qorti tispiċċa teħlishom mill-akkużi… il-Partit Laburista se jbiddel fehmtu u jgħid li l-Qorti mhiex ġusta?
Hi irresponsabbiltà kbira li wieħed ixewwex lill-poplu kontra l-Qorti. Huma r-reġimi dittatorjali jagħmlu dan! Infakkar li dawn huma l-istess persuni li kienu jgħidulna biex inħallu l-istituzzjonijiet jaħdmu. Issa, għaliex dawn l-istituzzjonijiet qegħdin jaħdmu, issa qed jiġu akkużati li qed jaħdmu!
Ħallu l-Qrati jaħdmu
L-appel tiegħi:
Huwa fl-interess tagħna lkoll li nħallu lill-Qorti taħdem. Inkunu qegħdin inġibu l-ġebla fuq saqajna lkoll jekk nispiċċaw nitilfu l-fiduċja fil-qrati tagħna.
L-ebda riżultat ta’ l-ebda elezzjoni ma hija tajba biex taħsel/taħfer l-ebda dnubiet/skandli ta’ ħadd. It-tajjeb u l-ħażin ma jiddependux mir-riżultati ta’ l-elezzjoni.
Dan kollu huwa ta’ ħsara għar-reputazzjoni ta’ pajjiżna. Mhux biss niġu l-aħħar fl-Eurovision imma qegħdin niġu anke l-aħħar fost il-membri tal-familja Ewropea fejn tidħol ġustizzja, is-sewwa u l-governanza tajba. Isem Malta qed jitħammeġ u dan mhuwiex qed isir minna imma minn dawk li huma akkużati.
Il-Partit Laburista qed ipoġġi l-ewwel l-interessi tal-partit u mhux tal-pajjiż. Tajjeb li jiftakar f’dak li kien jgħid Mintoff li Malta suppost li tiġi l-ewwel u qabel kollox! Jidher li l-Partit Laburista nesa dan u għalih l-interessi tal-partit huma l-ewwel u qabel kollox.
(Dan l-artiklu ġie ippublikat fuq il-gazzetta Il-Mument – 21 ta' Mejju, 2024)
Comments