Il-Kunsill talab lill-Awtorità tal-Ippjanar biex tiġi organizzata laqgħa pubblika għar-residenti. It-tweġiba kienet li mhix lesta tiltaqa' mar-residenti u tisma' x'għandhom xi jgħidu!
Hekk kif soppa tal-ħaxix mingħajr ħaxix ma tistax tissejjaħ hekk, konsultazzjoni pubblika ma tistax tissejjaħ ‘konsultazzjoni pubblika’ jekk m’hemmx il-pubbliku involut! Fftit tal-ġranet ilu tħabbar masterplan għal Paceville. Bħalma dejjem, dan il-Gvern, ħabbar dan bl-akbar pompa u b’ħafna reklami. Fihom hemm li l-pjan huwa miftuħ għall-konsultazzjoni pubblika.
Jien nifhem li l-pubbliku se jkun mistieden jagħti l-opinjoni, is-suġġerimenti u l-kritika tiegħu għal dan il-pjan hekk kbir għal Paceville. Iżda mhux hekk!
Bħala Viċi Sindku ta’ San Ġiljan u Paceville, nistqarr li r-residenti fl-ebda mument ma kienu konsultati. Lanqas il-Kunsill Lokali ma kien. Anzi, kien il-Kunsill Lokali li ħa l-inizjattiva biex jiltaqa’mar-rappreżentanti tal-Awtorità tal-Ippjanar!
Kieku verament l-Awtorit. tal-Ippjanar tixtieq tisma’ l-kummenti tar-residenti, kieku qabel ma ħareġ dan il-masterplan l-Awtorità kellha tfittex li l-ewwel titlob l-opinjoni tagħna. Imma mhux biss dan ma sarx, talli meta l-istess Kunsill talab lill-Awtorità tal-Ippjanar biex flimkien tiġi organizzata laqgħa pubblika għar-residenti, it-tweġiba tal-Awtorità kienet li mhix lesta tiltaqa’ mar-residenti u tisma’ x’għandhom xi jgħidu! Fir-realtà l-Gvern qiegħed juri li dan mhux minnu. Din tkompli tikxef il-maskra ta’ dan il-Gvern. Kulħadd jaf li jekk wieħed qiegħed jgħid li se jagħmel konsultazzjoni pubblika, il-pubbliku għandu jkun involut mill-bidu nett. Għaldaqstant, din il-konsultazzjoni hija waħda fażulla, jiġifieri konsultazzjoni falza.
Mill-masterplan f’Paceville joħroġ ċar li dan huwa biss ġabra ta’ proġetti li kienu miftiehma minn qabel l-elezzjoni. L-ironija hija li filwaqt li l-Gvern ma jridx jisma’ lir-residenti li jgħixu hawn, il-Partit Laburista sab il-ħin qabel l-elezzjoni biex jisma’ x-xewqat ta’ dawn l-iżviluppaturi. Issa qiegħed iwettaq dak li ftiehem magħhom. Tajjeb li ngħidu li fost il-ħafna proposti se jkun hemm mibnija madwar 22 torri kbir b’diversi binjiet oħra madwarhom. Wasal iż-żmien li f’Paceville ssir xi ħaġa. Is-sitwazzjoni f’Paceville mhix waħda tajba, mhux biss għar-residenti, imma għal kulħadd. Kulħadd jaqra u jisma’ l-ġrajjiet li jseħħu f’Paceville.
F’dan il-masterplan hemm diversi punti li jħassbu lir-residenti. Il-popolazzjoni se tikber minn 2,000 għal 9,000 ruħ. Dan mhux korrett sal-aħħar. Dan għaliex ma’ dan in-numru hemm bżonn li wieħed iżid it-turisti u tant eluf ta’ żgħażagħ u oħrajn li jiġu jiddevertu f’Paceville. Dan se jkompli jpoġġi pressjoni kbira fuq l-infrastruttura tal-lokalit. li diġ. hija nieqsa u batuta. L-infrastruttura pubblika, jiġifieri bħalma huma toroq, bankini, sistema ta’ drenaġġ, il-famuża proposta ta’mina oħra u tant ħwejjeġ oħrajn se jkunu lesti sal-2021. Wara dan se jibda l-bini ta’ dawn id-disa’ żviluppi. Intqal li dawn mhux se jinbnew flimkien imma fi stadji differenti. Dan iwassal għal diversi mistoqsijiet, fosthom dwar x’jiġri jekk l insfrastruttura ma tkunx lesta sa ħames snin oħra. U jekk l-iżviluppaturi se jibdew jibnu bil-mod il-mod, dan ma jfissirx li Paceville se jispiċċa kollu bini ta’ kostruzzjoni għal dawn l-għaxar snin li ġejjin? Pender Gardens ilu sejjer tmien snin u għadu mhux lest!
Proposta oħra ta’ tħassib għar-residenti hija li donnu se jkun hemm diversi pjazez miftuħa għall-pubbliku. Għalkemm l-idea hija tajba, fejn dawn il-pjazez qegħdin jiġu proposti attwalment hemm il-bini privat! Dan ifisser li jekk dawn il-pjazez se jsiru, id-djar u bini ieħor iridu jitneħħew. Jekk se jitneħħew, kif se jitneħħew, ta’min se jitneħħa u x’kumpens se jkun hemm? Ilkumpens li se jingħata se jkun biżżejjed għal koppja anzjana biex tixtri post ieħor fl-istess inħawi meta l-prezzijiet mitluba huma dak li huma? Dawn il-pjazez se jibqgħu pubbliċi jew se jispiċċa jkun hemm diversi kjoskijiet kummerċjali kif qiegħed jiġri fil-pjazza ta’ Tignè? Residenti oħrajn li jinsabu jgħixu f’San George’s Park jinsabu inkwetati għax wara li investew flushom fl-appartament tagħhom, issa se jkun hemm żvilupp kbir quddiemhom!
Proposti oħra ta’ tħassib huma l-land reclamation fil-baħar f’Portomaso, fejn se jittieħed il-baħar, it-trasport fejn il-Bajja ta’ Spinola se tispiċċa tkun park and ride , il-ġbir tal-iskart, fejn qiegħed ikun propost li f’Pembroke jkun hemm il-ġabra kollha tal-iskart f’Paceville, hemm ukoll il-kwistjoni ta’ dellijiet li ttorrijiet se jħallu u diversi proposti oħra.
Għaldaqstant, għaliex il-Kunsill Lokali jemmen f’konsultazzjoni vera u mhux fażulla, se ssir laqgħa għar-residenti kollha nhar il-Ġimgħa, 28 ta’ Otturbu fil-Millennium Chapel, f’Paceville, fis-7pm. Inħeġġeġ lir-residenti biex jattendu u jsemmgħu leħinhom.
(Dan l-artiklu ġie ippublikat fuq il-gazzetta Il-Mument – 23 ta' Ottubru, 2016)
Comments