‘Dar maqsuma fiha nnifisha, tispiċċa tiġġarraf’. Din mhix espressjoni tiegħi. Din espressjoni li qalha Ġesù minn Nazaret. Lil hinn minn tifsirha spiritwali, din l-espressjoni tfisser li fejn m’hemmx għaqda u serenità, wieħed jispiċċa f’baħar ta’ inkwiet u ġlied li jwassal biex jiġġarraf kollox. Dan ma jgħoddx biss għal relazzjonijiet umani, familji, negozju, imma anke għallpartiti politiċi.
Din l-espressjoni hija attwali għall-Partit Nazzjonalista f’dan il-mument tal-istorja tagħna.
Il-proċess tal-għażla ta’ kap ġdid iġib miegħu b’mod naturali opinjonijiet differenti fuq dawk li offrew li jkunu mexxejja ta’ dan il-partit. Matul dan il-proċess huwa naturali li wieħed jisma’ jew jaqra’ opinjonijiet li huma differenti u mimlija emozzjonijiet kbar.
Mhux biss il-politika fiha nnifisha hija suġġett li jqanqal passjonijiet u emozzjonijiet kbar, imma għalina l-Maltin, il-politika nikluha bil-ħobż u l-ġobon! Dan rajnieh fl-għażla tal-kandidati fl-Amerika. Sakemm intgħażel il-kandidat ta’ kull partit, kien hemm diversi diskussjonijiet jaħarqu u tensjonijiet kbar.
Għalkemm dan kollu huwa minnu u huwa ta’ ġid li fil-Partit ikun hemm diversità ta’ opinjonijiet u fehmiet varji, hemm linja ħamra li wieħed ma jistax jaqbiżha. Jekk wieħed jagħmel dan, allura jkun qiegħed ipoġġi lill-Partit f’periklu kbir. Din il-linja l-ħamra tissejjaħ mhux biss rispett lejn min għandu opinjoni differenti, imma hija l-għaqda tal-Partit. Sinċerament inħoss li f’dan il-mument, l-għaqda ta’ dan il-Partit hija dgħajfa. Dan qiegħed ngħidu b’qalb tqila u b’sens qawwi ta’ responsabbiltà u onestà.
Sfortunatament, in-nuqqas ta’ għaqda jinħass għaliex inħoss li mhux biss ċerti persuni qegħdin jappoġġjaw lil kandidat jew ieħor għall-gwadann personali tagħhom (u allura qegħdin jagħmlu minn kollox biex jibqgħu fi ċrieki interni), imma għaliex huma diversi dawk li qegħdin jitkellmu u jiktbu fuq ilmezzi soċjali b’passjoni għamja u mingħajr ma jiflu sew dak li qegħdin jgħidu jew jiktbu, u mhux biss. Illum il-ġurnata, ilmezzi soċjali, b’mod partikulari facebook, saru għodda importanti biex wieħed iwassal il-messaġġ tiegħu. Ilkoll nafu li lfacebook ħa post aġenziji tal-aħbarijiet u tal-gazzetti. Aħbar tixxandar f’ħakka t’għajn u ddur id-dinja f’leħħa ta’ berqa. Permezz ta’ dawn il-mezzi soċjali wieħed jagħmel ukoll kuntatti ma’ persuni ġodda u anke jiltaqa’ma’ persuni li jkun ilu ma jiltaqa’ personalment magħhom.
Għalkemm il-mezzi soċjali saru parti minn ħajjitna, ftit nindunaw kemm dawn il-mezzi soċjali mhux biss qegħdin jinfluwenzawna fil-ħsieb u fl-imġiba tagħna, imma jistgħu jkunu għodda ta’ ħsara u deni. Il-mezzi soċjali huma bħala sikkina li tista’ tintuża għat-tajjeb u tista’ tintuża għad-deni wkoll. L-għaqda fil-Partit ma taqax mis-sema.Wieħed irid jindukraha u jaħdem għaliha. Iż-żewġ kandidati u dawk ta’ madwarhom għandhom responsabbiltà kbira biex ma jkomplux jitfgħu lħatab fuq in-nar! Wieħed irid iżomm quddiem għajnejh li fis-17 ta’ Settembru se jkollna mexxej wieħed. Kif dan il-mexxej ilġdid – ikun min ikun – iġib ruħu fl-ewwel ġimgħat/xhur tal-ħatra tiegħu se jfisser ħafna għall-għaqda u l-futur tal-Partit.
Jekk il-mexxej magħżul jieħu l-attitudni li għaliex rebaħ hu, ikaxkar lil kulħadd, allura wieħed jistenna firda u mhux għaqda. Jekk min-naħa l-oħra, il-mexxej magħżul ikun għaref u matur biżżejjed biex joffri l-id tal-ħbiberija lill-kandidat mhux magħżul, allura dan ikun punt ta’ forza u maturità.
Tajjeb li niftakru li meta ntgħażel Eddie Fenech Adami bħala mexxej, Eddie offra l-id tal-ħbiberija sinċiera lil Guido de Marco. Dan ma għamlux biss fl-ewwel xhur imma matul il-karriera politika kollha tiegħu u sa wasal biex għażlu li jkun ukoll President ta’ pajjiżna! Dan huwa eżempju ta’ għaqda u maturità li wieħed għandu jsegwi.
Il-Partit Nazzjonalista meta ħalla l-firda fostu, spiċċa biex tilef mhux daqstant l-elezzjonijiet, imma s-serenità li jkun forza politika pożittiva. Bħal kull familja jew relazzjoni li ma jkollhiex serenità fi ħdanha u tispiċċa qisha ras maqtugħa; hekk jista’ jiġri lill-Partit Nazzjonalista f’dan il-mument tant delikat u importanti.
Għalhekk kull wieħed minna fil-jiem li ġejjin għandu responsabbiltà kbira biex iwieżen sew xi jgħid u jikteb.
(Dan l-artiklu ġie ippublikat fuq il-gazzetta Il-Mument – 10 ta' Settembru, 2017)
Commentaires