Ejjew inkomplu naħdmu lkoll flimkien mhux biss għall-ġid tal-partit imma fuq kollox għall-ġid ta’ din l-omm li tagħtna isimha, Malta tagħna.
Il-poplu bagħat messaġġ ċar. Ċar daqs il-kristall.
Min għandu widnjen, ħa jisma’ sew!
Matul il-kampanija elettorali, il-Partit Laburista għamel minn kollox, mhux biss biex jikkonvinċi lin-nies, imma saħansitra għamel minn kollox biex jixtri l-vot tagħhom. Qassam ċekkijiet tal-flus, ħareġ skemi ta’ għajnuna, ta promotions lil ħaddiema tal-Gvern, irranġa bankini u toroq, u ffirma ftehim ma’ dak jew mal-ieħor. Mhux biss. Wasal saħansitra biex jagħti appartamenti tal-Gvern biex forsi jirbaħ il-voti!
Imma kienu diversi u diversi dawk iċ-ċittadini li filwaqt li ħadu dak li bagħtilhom il-Gvern, spiċċaw beżqulu fis-sunnara!
Nemmen li dan huwa l-ewwel messaġġ. Diversi ċittadini huma ntelliġenti biżżejjed biex jintebħu li l-Gvern qiegħed biss jipprova jroxx il-bżar fl-għajnejn. Ħareġ ċar li diversi u diversi ċittadini mhumiex għal bejgħ u ma jinxtarawx!
Jitmejjel bil-Laburisti
Għalkemm il-Partit Laburista teknikament rebaħ dawn l-elezzjonijiet, u dan kien previst li jseħħ IMMA politikament, il-Partit Laburista ‘tilef’ din l-elezzjoni. Li jipprova jbenġilha ma’ dawk Laburisti bħala rebħa ‘soda’, ikompli jikkonferma li l-Partit Laburista jibni kollox fuq lis-spin, jiġifieri fuq tawwiġ tal-verità!
Għaliex qiegħed ngħid li l-Partit Laburista tilef politikament din l-elezzjoni?
Tajjeb li ngħid li fl-aħħar elezzjoni li kellna fl-2019, il-PL rebaħ b’distakk ta’ 42,600 vot. Din kienet rebħa soda u konvinċenti tassew. Imma f’din l-elezzjoni, il-Partit Laburista rebaħ b’distakk ta’ 8,454 vot. Dan ifisser li naqas il-voti mhux b’wieħed jew tnejn IMMA bi 34, 141 vot!
Il-messaġġ kien wieħed ċar.
Jidher ċar li diversi u diversi huma dawk li mhux biss it-tlellix u l-propoganda tal-Gvern mhux qed jimpressjonawhom aktar, imma huma rrabjati u diżappuntati li l-Partit Laburista donnu sar refuġju u dar tal-ħallellin u l-frodisti. Donnu l-PL sar tarka tal-korrotti!
Matul dawn il-ħdax-il sena, kellna skandlu wieħed akbar minn ieħor. Bdejna bl-iskandlu tal-Cafè Premier, imbagħad kellna l-kontijiet sigriet tal-Panama, imbagħad bil-wind farms ġewwa Montenegro, l-istejjer ta’ 17 Black, il-qtil makabru ta’ Daphne u t-tkaxkir tas-saqajn tal-Gvern biex toħroġ il-verità, l-iskandlu tal-flyover tal-Marsa, skandli tal-liċenżji tas-sewqan, l-iskandi tal-benefiċċji soċjali u tant oxxenitajiet ta’ promotions u direct orders. Imma l-akbar żewġ skandli li għezzew lil poplu ċertament kienu l-inkjesta ta’ Jean Paul Sofia u l-inkjesta tal-isptarijiet tal-Vitals/Stewards li waslu biex għall-ewwel darba fl-istorja politika ta’ pajjiżna, ex prim ministru, deputat prim ministru, ministri u segretarji parlamentarji jkunu akkużati quddiem il-Qorti b’akkużi serji ta’ frodi u korruzjoni!
Robert għamel ħafna żbalji
Robert Abela flok qata’ id il-qarnita (metaforikament), spiċċa biex tgħannaq magħha. Flok ġab ruħu ta’ Prim Minitru ta’ pajjiż fl-Unjoni Ewropea, spiċċa jagħmilha ta’ avukat difensur.
Flok ġab l-interessi ta’ pajjiżna, għażel li jpoġġi l-interessi tal-Partit u tiegħu l-ewwel. Spiċċa jgħajjar lil min qed jaħdem għas-sewwa u l-verità bħala tradituri minflok li ċanfar lil min kien il-protaganist f’din il-ħadma!
Robert Abela fl-aħħar jiem talab l-appoġġ tal-Laburisti biex jibagħtu messaġġ qawwi ta’ fiduċja fih u fil-Gvern tiegħu.
U diversi tkellmu bil-vot tagħhom li tilfu l-fiducja fih u fil-Gvern Laburista. Jidher ċar li diversi Laburisti mhux biss semgħu minn Desmond Zammit Marmarà, li kiteb biex il-Laburista jagħmlu favur lil Malta u ma joħorġux jivvutaw, imma oħrajn għalkemm marru jivvutaw (biex ma jkunux ittimbrati li ma ħarġux), ħassru l-vot tagħhom jew inkella taw l-ewwel preferenza tagħhom lil Roberta Metsola. Fil-fatt, diversi voti kellhom preferenza għal Roberta biss! Nemmen li dawn kienu fil-maġġoranza tagħhom Laburisiti!
Minn naħa l-oħra, nemmen li għalkemm il-Partit Nazzjonalista teknikament tilef din l-elezzjoni, imma politikament rebaħ. U ngħid għaliex?
Irbaħna t-tielet siġġu Ewropew
Mhux biss il-PN reġa’ rebaħ it-tielet siġġu jew inkella għaliex żied il-voti tiegħu. Fil-fatt, din l-elezzjoni Ewropea kienet l-aktar riżultat pożittiv li kellu l-Partit minn kemm ilna li dħalna bħala membri.
Nemmen bis-sħiħ li rbaħna poltikament għaliex il-PN kellu kollox kontrih. Kien tassew l-underdog, kif tal-Labour kienu jħobbu jgħidu! Il-PN kellu mhux biss l-istazzjoni TVM kontrih, li kontinwament kien magna ta’ propoganda kontinwa favur il-Gvern, imma saħansitra s-surveys wieħed wara l-ieħor li kienu qed ibassru lid-distakk kien ser ikun ta’ madwar 27 jew 30 elf! Dan żgur ħalla mpatt psikoloġiku mhux biss fuq il-votanti imma anke fuqna d-deputati, kandidati u attivisti! Diversi kenu jgħajruna ‘fejn huma n-Nazzjonalisti’ jew inkella jgħidulna li kollox għal xejn għaliex aħna spiċċajna erbgħa qtattes!
IMMA, u hawn qegħdha l-imma kollha, bħal ma David ma beżax mill-ġgant Gulija, hekk ukoll aħna lkoll ma qtajnix qatt qalba. Ilkoll kemm aħna ħdimna fuq li ħdimna. Għalkemm kulħadd għamel il-parti tiegħu, żgur li ma nistax ma nsellimx l-impenn tal-Kap Bernard Grech, tas-Segretarju Ġenerali Michael Piccinino u tal-campaign manager, Karl Gouder li verament emmnu u ħadmu għal dan ir-riżultat.
Dan ir-rizultat huwa l-bidu u mhux it-tmiem.
Il-bidu ta’ mixja oħra u itwal li għandha twassalna għal rebħa oħra. Għaldaqstant, tajjeb ukoll li l-Partit jisma’ ukoll l-messaġġ li bagħtu diversi li għażlu li jħassru l-vot tagħhom jew inkella jivvutaw kandidati independenti.
Viċin in-nies
Hemmhekk hemm messaġġ li hemm bżonn nisimgħu wkoll. Għalhekk nagħmel appell li f’dawn ix-xhur li ġejjin nagħrblu sew dan ir-riżultat u nieħdu l-passi meħtieġa biex nirrispondu. Irridu nirbħu fuq il-merti tagħna u mhux fuq id-disfatta ta’ ħaddieħor!
Nifraħ minn qalbi lil Roberta, lil David u lil Peter għas-suċċess tagħhom. Aħna kburin bikom! Ninsab ċert li sejrin tagħmlu unur mhux biss lil partit imma lil Malta!
Nirringrazzja wkoll lil kandidati l-oħra li għalkemm ma ġewx eletti ninsab ċert li għandhom kontribut x’jagħtu lill-Partit.
Ejjew inkomplu naħdmu lkoll flimkien mhux biss għall-ġid tal-Partit imma fuq kollox għall-ġid ta’ din l-omm li tagħtna isimha, Malta tagħna.
Prosit tassew lil kulħadd. FLIMKIEN NASLU!
(Dan l-artiklu ġie ippublikat fuq il-gazzetta Il-Mument – 16 ta' Ġunju, 2024)
Comments