Il-kotra miġbura kellha wkoll għajta waħda: irridu ngħixu f'pajjiż nadif. Irridu ngħixu f'pajjiż normali.
“Miskin min ikażbarni. Miskin min jidħaq bija.” Hekk kiteb Rużar Briffa fil-poeżija tiegħu meta l-Maltin qamu kontra l-ħakkiem barrani. Hekk stqarr ukoll Simon Busuttil nhar il-Ħadd meta l-poplu mill-ġdid semma’ leħnu b’eluf miġbura fil-Belt Valletta.
Wara kważi erba’ snin biss ta’ Gvern Laburista, li tela’ bil-wegħda ta’ politika nadifa u ġdida, il-poplu kellu jerġa’ joħroġ isemma’ leħnu. Il-poplu jinsab diżappuntat li ġie mqarraq. Il-poplu jħoss li Joseph Muscat daħaq bih. Għalhekk il-poplu huwa rrabjat. Deher ċar li l-poplu miġbur huwa mdejjaq bis-sensiela sħiħa ta’ skandli. Il-poplu qiegħed jifhemli jekk dawn l-iskandli jispiċċaw isiru qishom mhuma xejn, allura ‘ruħ’ pajjiżna se tispiċċa. Għaldaqstant, il-poplu mhuwiex kuntent bil-mod li bih qiegħed imexxi dan il-Gvern. Il-kotra miġbura kellha wkoll għajta waħda: irridu ngħixu f’pajjiż nadif. Irridu ngħixu f’pajjiż normali.
Il-maġġoranza taċ-ċittadini huma onesti. Jaqilgħu l-ħobża tagħhom bl-għaraq ta’ ġbinhom, iħallsu t-taxxi, iħobbu lil pajjiżhom u jixtiequ l-ġid lil din “l-art li tatna isimha”. Il-kotra fehmet li l-korruzzjoni hija theddida għall-istess demokrazija tagħna. Jekk xi ħadd m’għandu ebda skruplu li jwettaq korruzzjoni, mhu se jkollu ebda skruplu biex jibqa’ jiffanga u jiggranfa mas-siġġu tal-poter. Min għandu d-dell tal-korruzzjoni fuqu, ma jistax imexxi bis-serenità meħtieġa.
Wara kważi erba’ snin ta’ tmexxija Laburista u wara sensiela sħiħa ta’ stejjer ta’ korruzzjoni u skandli li ma jispiċċawx, il-kotra Maltija ma tridx tgħix f’soċjetà diżonesta u maħmuġa. Ma tixtieqx li wliedha jikbru f’soċjetà fejn xejn mhu xejn, u li kollox jgħaddi. Ma riditx li hi u wliedha jgħixu f’soċjetà fejn il-korruzzjoni hija n-norma tal-ħajja u mhux l-eċċezzjoni.
Il-kotra miġbura wasslet messaġġ ċar li mhix se tittollera aktar lil min jinqeda biha biex jiffanga u jsir sinjur minn fuq daharha. Hija tal-mistħija li jkollok persuna bħala Ministru (mingħajr portafoll) u dak li jmexxi l-Uffiċċju tal-Prim Ministru, li jkollhom kumpaniji u kontijiet fil-Panama, magħrufa aħjar bħala l-ġenna ta’ min irid jevita t-taxxa u jaħsel flusu li ġew minn attività kriminali jew illegali. Mhux hekk biss, hija insult kbir lejn l-intelliġenza ta’ kull min juża moħħu li tisma’ lil Konrad Mizzi jgħid li din l-istorja kollha dwaru hija biss ‘fake news ’. Hija diżonestà kbira li tisma’ lil Konrad jgħid li wara sena li faqqgħet din l-istorja, issa donnu jiddispjaċih li fetaħ dawn il-kontijiet! B’min irid jgħaddi ż-żmien? Ilkoll ċerti li kieku ma nqabadx fil-beraħ b’dak li għamel, kieku llum għadu għaddej b’dawn il-kontijiet!
Hija tal-mistħija li, filwaqt li seħibhom, il-Ministru tal-Finanzi qiegħed jagħmel ħiltu kollha biex jara li ebda Malti ma jevita t-taxxi u, saħansitra, iħarrek lil min evita t-taxxi, dawn is-sinjuri jippjanaw li, fis-sigriet u fil-ħemda, jiftħu kontijiet u kumpaniji, wara ftit ġranet biss li l-Partit Laburista rebaħ l-elezzjoni ġenerali. Hija tal-mistħija li filwaqt li l-Gvern jiġri wara dawk li jabbużaw mis-servizzi soċjali, mingħajr lanqas jagħti kas, forsi tal-vulnerabbiltà tagħhom; li waqt li l-pensjonanti jippruvaw jaraw kif se jwasslu sal-aħħar tax-xahar; jew li waqt li persuni morda bil-kanċer jittallbu għand il-President biex tgħinhom biex ikollhom il-kura meħtieġa, il-Ministru u martu jkomplu jiffangaw mingħajr mistħija ta’ xejn.
Qabel l-elezzjoni Konrad kellu ħabta jesprimi l-espressjoni “shame on you”. Issa, din l-espressjoni toqgħod perfettament għalih. Ħasra lima għandux żejt f’wiċċu biex jistħi. Ma jridx ikollok żejt f’wiċċek biex tibqa’ għaddej bil-ħidma tiegħek qisuma ġara xejn. Irid verament ikollu wiċċu maħmuġ biex jiftaħar li huwa l-asset għall-Gvern Laburista u li anke se jerġa’ joħroġ għall-elezzjoni ġenerali li jmiss! Kieku dan jiġri f’pajjiż normali, kieku wieħed lanqas joħroġ mill-bieb ’il barra bil-mistħija!
Dan il-Gvern Laburista ma baqagħlu l-ebda mistħija ta’ xejn.
Id-diskors ta’ Simon jikxef persuna determinata, li qed tikber f’mexxej onest li jista’ jagħtina verament il-bidla li wiegħed il-Partit Laburista imma li m’għamilhiex. Simon Busuttil tkellem ċar li huwa jemmen fl-onestà politika. Tkellem ċar li ma jistax ikun li ngħixu f’soċjetà fejn il-ħażin qiegħed jissejjaħ tajjeb, u l-kontra. Simon Busuttil tkellem bil-qalb u b’passjoni ta’ persuna li tista’ terġa’ trodd l-unur lil dan il-pajjiż.
Kif Simon Busuttil ħadem qatigħ biex Malta tingħaqad mal-UE, issa huwa l-mexxej li jrid jgħolli l-livell tad-demokrazija f’pajjiżna. Bħala mexxej ta’ partit u ta’ gvern futur, mhu se jittollera ebda korruzzjoni, u dan diġà wrieh bil-fatt, fi ħdan il-partit tiegħu stess. L-iżbalji tal-passat għandhom ikunu tagħlima għalina lkoll. Rebħa tal-PN mhix daqstant rebħa ta’ partit imma rebħa għal Malta onestà.
Għaldaqstant, ejjew naħdmu lkoll flimkien. Ejjew ninsew dawk id-differenzi li forsi jista’ jkollna bejnietna. Ejjew ma narawx sal-ponta ta’ mneħirna. Ejjew infittxu l-għaqda ta’ bejnietna u nibqgħu ffukati fuq il-kwistjonijiet veri f’dan il-pajjiż. Hija fl-għaqda ta’ bejnietna li nistgħu nroddu l-onestà lil Malta tagħna.
Nhar il-Ħadd, il-kotra qamet u għajtet: “Miskin min ikażbarni, miskin min jidħaq bija!”
(Dan l-artiklu ġie ippublikat fuq il-gazzetta Il-Mument – 26 ta' Frar, 2017)
Comments