Pajjiżna għandu bżonn Oppożizzjoni b'saħħitha. Pajjiżna jistħoqqlu Partit Nazzjonalista li għalkemm għandu ħsibijiet differenti, huwa partit b'saħħtu u magħqud! Għalhekk jien nagħżel il-valur tal-għaqda!
Bħalissa l-Partit Nazzjonalista għaddej minn mumenti diffiċli, u dan minħabba diversi raġunijiet.
1. Ġarrab it-tieni telfa tiegħu. F’kull elezzjoni wieħed jaħdem qatigħ biex il-poplu jafdah bit-tmexxija. Imma d-deċiżjoni tal-poplu hija waħda sovrana! Il-PN ma kienx qiegħed jistenna dan ir-riżultat u jinsab maħsud. L-istorja tfakkarna li l-PN tilef l-elezzjoni mhux biss tal-1971 imma anke dik ta’ wara, fl-1976.
Teknikament, il-Partit tilef anke l-elezzjoni tal-1981! Jekk irriżultat ta’ issa huwa diżappuntanti, kien ukoll fl-1971 meta l-Partit Laburista kien rebaħ biss b’4,695 vot aktar! Dan li għaddejjin minnu bħalissa għadda wkoll minnu l-Partit Laburista meta fl-2008 tilef l-elezzjoni bi żbrixx u ġab 1,580 inqas!
2. Elezzjoni ta’ mexxej ġdid. Wara d-deċiżjoni ta’ Simon Busuttil li ma jibqax mexxej tal-Partit issa ninsabu fi proċess li jintgħażel mexxej ġdid. Diġà hemm minn wera l-intenzjoni tiegħu li jidħol għal din il-kariga u hemm oħrajn li għadhom jaħsbuha. Matul il-ġimgħa li ġejja jkollna l-lista sħiħa ta’ kandidati. Huwa mument diffiċli fil-ħajja tal-Partit mhux biss għaliex bħalissa l-Partit għandu ‘caretaker leader’ imma għaliex kull kandidat ikollu n-nies tiegħu. Faċli ħafna li bħal f’kull għażla jkun hemm differenzi ta’ ħsibijiet u opinjonijiet differenti. Dan fih innifsu huwa ta’ ġid għaliex ifisser mhux biss li hemm id-diffikultà tal-għażla imma li hemm minn fejn wieħed jagħżel! Huwa importanti li ngħaddu minn dan il-proċess b’mod l-aktar seren, nisimgħu lil kull kandidat u ngħarblu l-viżjoni u l-proposti tiegħu. Il-ħsara tkun meta nagħżlu mhux fl-interess tal-Partit imma nagħżlu għaliex jaqbel għalina nfusna! Tkun ħasra li l-għażla tagħna ma tkunx matura imma skont il-grupp li nkunu miegħu! Huwa importanti li wara li jkun hemm l-għażla, min jirbaħ jipprova jinvolvi lil min tilef. Min-naħa l-oħra, min tilef jaċċetta r-rieda tal-maġġoranza! Huwa importanti li wara li ssir l-għażla, ikun hemm l-għaqda u niġbdu l-istess ħabel. Jidher li dan mhux dejjem kien! Forsi r-riżultat li kellna flaħħar żewġ elezzjonijiet huwa wkoll frott ta’ dan. Żgur li l-mexxej il-ġdid għandu għadma iebsa u jrid jaħdem qatigħ biex iġib l-għaqda meħtieġa.
3. Għaliex Joseph Muscat jaf li bħalissa l-PN huwa fl-akbar mument debboli tiegħu, huwa ressaq mozzjoni bil-ħeffa kollha fuq l-ugwaljanza fiż-żwieġ. Hija mossa oħra biex ikompli jdgħajjef lill-PN. Ma kienx u ma jidhirx li kien hemm xi għaġla partikulari għal din il-mozzjoni. Għalkemm il-PN qabel ma’ din il-proposta fi prinċipju, xi wħud fil-Partit kellhom ukoll xi riżervi fuq kif ġiet miktuba din il-proposta.
Ma nixtieqx nidħol fl-argument mhux biss għaliex din issa għaddiet imma sinċerament inħoss li kull naħa tal-argument hija valida. Anzi, jekk wieħed jara l-argument – ta’ naħa jew oħra – barra mill-kuntest tal-argument oppost, wieħed jispiċċa jaqbel mal-istess argument! Dan huwa s-sabiħ tal-PN. Fl-istorja tal-Partit dejjem kien hemm persuni bi ħsibijiet differenti li flimkien ħadmu fl-istess partit. Xi wħud iħobbu jsejħulhom ‘liberali’ u ‘konservattivi’. Personalment, ittikketti ma tantx jogħġbuni. Nippreferi li ngħid li hemm ħsibijiet differenti.
Huwa tajjeb li fil-Partit jibqa’ jkun hemm spazju biex kull min għandu ħsibijiet differenti jibqa’ jsemma’ leħnu. Għaldaqstant, l-opinjoni ta’ Edwin Vassallo u Tonio Fenech hija l-leħen ta’ diversi fil-Partit li tajjeb li jibqa’ jinstema’ jekk il-Partit jixtieq jibqa’ jgħodd għal dawn innies. Min-naħa l-oħra, il-leħen ta’ min huwa favur għandu jibqa’ wkoll biex jippreżenta lil dawk li jaqblu ma’ din il-proposta.
Għalkemm forsi hemm nuqqas ta’ qbil fuq dan is-suġġett, hemm qbil fuq ħwejjeġ oħra. Għaldaqstant, tajjeb li niftakru li hemm ħafna fuqiex naqblu, aktar milli fuq dak li ma naqblux!
Ilkoll naqblu pereżempju fuq:
Id-dritt tal-ħajja mill-bidu nett tal-konċepiment sal-aħħar mument;
Għajnuna lil dawk li huma vulnerabbli u għandhom ċerti vizzji;
Il-ġlieda fuq l-illitteriżmu u n-nuqqas ta’ attendenza fl-iskola;
Li d-dinjità tal-persuna tiġi qabel il-profitt tal-ekonomija;
Il-prekarjat u l-kundizzjonijiet tal-ħaddiema tagħna;
Nagħtu l-aħjar opportunitajiet liż-żgħażagħ tagħna biex jimxu ’l quddiem fil-ħajja;
Noffru ‘start-ups’ u boroż ta’ studju liż-żgħażagħ tagħna;
Għajnuna lil persuni b’diżabbiltà u sapport lill-familji tagħhom;
Nagħtu s-sapport meħtieġ lill-anzjani biex dawn jibqgħu jgħixu fil-komunità;
Il-Kunsilli Lokali jkunu verament gvern lokali;
Ġlieda kontra l-korruzzjoni, inqas burokrazija u bżonn ta’ akkontabbiltà;
Ħatrijet li jkun hemm qbil fuqhom bejn kulħadd, fosthom il-President tar-Repubblika u l-Kummissjarju tal- Pulizija;
Ir-rwol ta’Malta fl-Komunità Ewropea;
Għajnuna lis-self employed u lil negozjanti oħrajn;
Bżonn li nieħdu ħsieb l-ambjent u l-iżvilupp sostenibbli.
Nista’ nkompli bil-lista sħiħa ta’ fejn hemm qbil. Għalhekk nagħmlu tajjeb li nitkellmu fuq dak li jgħaqqadna u mhux fuq dak li jifridna.
Pajjiżna għandu bżonn Oppożizzjoni b’saħħitha. Pajjiżna jistħoqqlu Partit Nazzjonalista li għalkemm għandu ħsibijiet differenti, huwa partit b’saħħtu u magħqud!
Għalhekk jien nagħżel il-valur tal-għaqda!
(Dan l-artiklu ġie ippublikat fuq il-gazzetta Il-Mument – 16 ta' Lulju, 2017)
Comments