Nagħżel il-ħajja

Quddiem il-ħajja għandu jkun hemm politika li tagħżel il-ħajja f'kull ħin.

Ħajjitna hija magħmula minn ħafna għażliet. Xi wħud minn dawn l-għażliet huma żgħar. Oħrajn huma kbar. Hemm għażliet li rrid nagħmel kuljum mal-ġurnata, bħal liema qmis se nilbes. Hemm ukoll għażliet aktar importanti, bħal liema karriera se naqbad. F’kull għażla, kbira jew żgħira, irrid nerfa’ r-responsabbiltà ta’ dik l-għażla li nkun għażilt. Nifhem li kull għażla ġġorr magħha konsegwenzi, xi wħud żgħar waqt li oħrajn akbar u li jistgħu jeffettaw il-vjaġġ ta’ ħajti.

Imma filwaqt li f’ħajjitna hemm dawn l-għażliet, hemm għażla waħda li hija fundamentali u li ironikament ma konniex aħna li ddeċidejna dwarha! Din hija meta l-ġenituri tagħna għażlu li jagħtuna l-opportunit. tal-ħajja. Mhux hekk biss. Ommijietna għażlu li jġorru din l-għażla sal-milja tagħha. Dan ifisser li l-ġenituri tagħna għażlu għalina li jagħtuna l-ħajja. Ma konniex aħna li għażilna l-ħajja. Wieħed jista’ jgħid li kienet proprju l-ħajja, permezz tal-ġenituri tagħna, li għażlitna!

Dan huwa l-akbar rigal u don li rċevejna. Kulma aħna u kulma għandna matul dan il-vjaġġ tal-ħajja huwa mibni fuq dan il-punt fundamentali. Ma kontx inkun jien, b’dak kollu li jagħmilni jien, jekk ma ġejtx mogħti din l-opportunità tal-ħajja.

Imma għalkemm ma għażilniex aħna li nitwieldu nagħmlu tajjeb li niftakru li issa jiddependi minna lkoll jekk din il-ħajja li rċevejna ngħixuhiex fil-milja tagħha jew le. Għalkemm ħajjitna kienet rigal, il-mod kif se nagħżlu li ngħixu dan ir-rigal, dan se jkun ‘ir-rigal tagħna’ lejn l-istess ħajja. Issa jiddependi minni jekk nagħmilx din il-ħajja storja ta’ suċċess jew waħda ta’ falliment. Issa jiddependi minni jekk naħtafx din l-opportunità li NGĦIX jew inkella li NEŻISTI. Issa jiddependi minni jekk induqx mill-benna tal-ħajja jew le. Issa jiddependi minna jekk inkunux ambaxxaturi tal-ħajja jew le.

Għaliex qiegħed ngħid dan kollu? Qiegħed ngħid dan għax kif wieħed jista’ jixtarr, id-diskors fuq l-għażla tal-abort daħal sew fostna. Min għandu l-għan li jdaħħal l-abort, jaf sew li jista’ jirbaħ is-simpatija biss billi jġib ‘raġunijiet’ bħalma smajna diġà– li wieħed għandu jkollu l-għażla li jtemm it-tqala, li fetu huwa biċċa laħam, f’każ ta’ vjolenza sesswali, li l-fetu huwa parti mill-ġisem tal-mara li għandha jkollha dritt fuq ġisimha, f’każ ta’ trabi diżabbli (dan huwa insult kbir lil persuni diżabbli), fost argumenti oħra. U għaliex dawn l-ambaxxaturi għandhom warajhom ‘forzi ekonomiċi’, allura ċerti media u mezzi soċjali oħrajn qegħdin irewħu u jsemmgħu leħenhom bit-tama li jimlew ukoll buthom… l-aqwa żmien!

Personalment, nemmen li għalkemm ilkoll ngħixu f’soċjetà demokratika u allura għandhom dritt li juru l-opinjoni tagħhom, fl-istess waqt AĦNA għandna wkoll id-dritt (u ddmir) li nsemmgħu leħenna wkoll. Ma nistgħux nibqgħu donna aħna ‘ġbejniet’! Min huwa favur l-abort jinsa punt fundamentali kbir: li l-fetu huwa persuna indipendenti u b’dinjità umana. Jien nista’ ngħid li għandi 53 sena għax xi darba kont fetu. Għalkemm kbirt, twalt u issa niżen ’il fuq minn 80 kilo, xorta jien l-istess Albert meta kont fetu, 53 sena ilu! Jien dak li jien minħabba dak li kont!

Il-messaġġ tagħna ma għandux biss iwassal argumenti għaliex aħna kontra kull qtil tal-innoċenti u dwar il-konsegwenzi psikoloġiċi tal-abort imma nemmen li lmessaġġ tagħna għandu jkun aktar fuq is-sabiħ tal-ħajja.

Nemmen bis-sħiħ li l-messaġġ tagħna għandu jkun wieħed pożittiv li juri li l-ħajja, bit-tajjeb u bil-ħażin tagħha, hija sabiħa.

U għaliex nemmnu bis-sħiħ li l-ħajja hija sabiħa ma rridu nċaħħdu lil ħadd milli huwa wkoll jagħmel din l-esperjenza pożittiva tal-ħajja. U mhux hekk biss. Nemmen li lkoll kemm aħna msejħa biex matul ħajjitna nagħmlu l-ħajja daqsxejn aktar sabiħa milli sibnieha. Hekk għamel Mozart. Hekk għamel Michelangelo. Hekk għamel Nelson Mandela. Hekk għamlu tant nies oħrajn li fis-silenzju tal-ħajja għamlu ħwejjeġ kbar.

Kieku Mozart ma nagħatx din l-opportunit., kieku ma għandniex il-ġmiel tal-mużika li ħalla. Mingħajr Michelangelo ma kienx ikollna l-kapulavuri tal-arti. Mingħajr Nelson Mandela, l-Afrika t’Isfel ma kienx ikollha l-libert.! Mingħajr ilkontribut tagħna lkoll, id-dinja hija nieqsa mill-kuluri. L-abort iwaqqaf ħesrem din l-opportunit.. L-abort huwa ħela ta’ potenzjal uman.

Il-Partit Nazzjonalista huwa ċar daqs il-kristall f’din lgħażla. Adrian Delia tkellem b’determinazzjoni qawwija fuq l-abort. Ma beżax juri l-fehma tiegħu. Stqarr u wiegħed li l-Partit Nazzjonalista se jkun mhux biss il-vuċi ta’ dawk li ma għandhomx vuċi imma wkoll se jkun forza favur il-ħajja. Il-Partit Nazzjonalista jrid iwettaq politika favur il-ħajja u jagħti l-appoġġ lil dawk li forsi għandhom problemi fit-tqala tagħhom. Għalkemm il-Partit Laburista u l-Mexxej Laburista stqarrew li mhumiex kontra l-abort ukoll, l-esperjenza turi li mhux kulma jgħid Joseph Muscat, fir-realt. jseħħ. L-esperjenza turina li l-Gvern Laburista jekk ma jidħolx millbieb, jidħol mit-tieqa.

F’dawn l-aħħar xhur fil-Parlament, il-Gvern Laburista neħħa kull referenza għal vjolenza domestika fuq it-tarbija fil-ġuf. L-istess eks-Ministru George Vella tkellem kontra din il-mossa politika. Jidher li bil-mod il-mod, il-Gvern Laburista qiegħed idgħajjef ċerti liġijiet u qed jipprepara t-triq. Iddiskors tal-Ministru Helena Dalli li nkixfet tgħid dan l-aħħar ċertu diskors, juri kif il-Partit Laburista daħaq bil-poplu fuq l-intenzjonijiet veri tiegħu meta ried idaħħal miżuri soċjali oħra.

Għalkemm fuq din il-miżura partikolari, illum hemm qbil minn kulħadd, fuq l-introduzzjoni tal-abort tajjeb li l-Gvern ikun onest, ċar u jpoġġi l-karti kollha fuq il-mejda kif għamel il-Partit Nazzjonalista.

Mal-valur tal-ħajja ma għandux ikun hemm logħob. Malvalur tal-ħajja ma għandux ikun hemm politika partiġjana. Quddiem il-ħajja għandu jkun hemm politika li tagħżel ilħajja f’kull ħin.

Jien nagħżel il-ħajja, dejjem u f’kull waqt.

U inti?

(Dan l-artiklu ġie ippublikat fuq il-gazzetta Il-Mument – 25 ta' Marzu, 2018)