Id-diffikultà tiegħi u ta' diversi residenti oħra mhux daqstant bl-iżvilupp fih innifsu, imma li hawn u se jkun hawn żvilupp aktar milli nifilħu.
Bil-Malti għandna l-espressjoni ‘nejja jew maħruqa’. Din l-espressjoni tfisser li wieħed imur fl-estrem. Jew xejn jew kollox. Ma hemmx bilanċ. Din l-espressjoni tista’ tingħad għal dak li qiegħed jiġri f’San Ġiljan.
Preżentement, f’San Ġiljan, fl-inħawi tal-Bajja ta’ San Ġorġ u l-madwar, ħarġu diversi proposti u talbiet biex jinbnew torrijiet b’diversi sulari. Fost il-proposti nsibu: torri b’36 sular fejn Villa Rosa, żewġ torrijiet b’29 u 23 sular minflok l-iskola ITS, torri ta’ 44 sular f’St George’s Park, lukanda u appartamenti b’29 sular ħdejn l-InterContinental, bini ta’ żewġ torrijiet ta’ 25 u 40 sular imsejħa Mercury Towers u żewġ torrijiet oħra b’diversi sulari minflok il-lukanda Corinthia. Barra dawn il-proposti hemm diversi binjiet oħra li diġà telgħu u hemm ukoll l-iżvilupp ta’ Pender Gardens li se jkompli jkabbar u jibni torri ta’ 18 u 26 sular.
Personalment, ma għandi l-ebda diffikultà fuq l-iżvilupp tal-bini. Ilkoll naqblu li l-iżvilupp tal-bini jdawwar l-ekonomija Maltija. Diversi familji jiddependu minn dan id-dħul. Hemm ċertu qbil ukoll li l-bini ta’ appartamenti fil-għoli huwa waħda mis-soluzzjonijiet għan-nuqqas ta’ art li għandna bħala pajjiż. Ilkoll naqblu wkoll li San Ġiljan, b’mod partikulari Paceville, minn post trankwill u post tal-villeġġjatura nbidel għal ċentru prinċipali ta’ divertiment għal diversi Maltin u turisti li jiġu f’pajjiżna. Fuq dan hemm qbil minn kulħadd. Filwaqt li naqbel ma’ dan kollu, id-diffikultà tiegħi u ta’ diversi residenti oħra li jgħixu f’dawn l-inħawi hija mhux daqstant bl-iżvilupp fih innifsu, imma li hawn u se jkun hawn, u nħoss li se jkun hawn, żvilupp aktar milli nifilħu. Inħoss li qegħdin f’sitwazzjoni li ngħixu din l-espressjoni ta’ ‘nejja jew maħruqa’. Nistqarr li dawn il-proposti kollha ta’ żvilupp huma żżejjed għal din il-lokalità.
Din mhix ħasra għal din il-lokalità biss, imma għall-pajjiż b’mod inġenerali wkoll. Dan jista’ jwassal għal dak li l-Ministru tal-Finanzi stess stqarr li dan jista’ ma jkunx żvilupp sostenibbli għall-pajjiż. Barra minn hekk, hemm ukoll diffikultà fuq livell ta’ ambjent. Dan l-iżvilupp ta’ diversi torrijiet f’daqqa jista’ jwassal biex ikun hemm dehra kerha u wkoll biex diversi residenti li jgħixu fil-madwar jispiċċaw kontinwament jgħixu fid-dell li jħallu dawn it-torrijiet. Fil-fatt, diversi NGOs ambjentali qegħdin isemmgħu leħinhom dwar dan. Bħala Viċi Sindku ta’ San Ġiljan, l-akbar problema li nħoss li wieħed għandu jagħtiha importanza hija li mhux biss wieħed jibni dan l-iżvilupp kollu, imma jrid jieħu ħsieb l-infrastruttura fiżika u soċjali biex tilqa’ għal dan l-impatt. Preżentement, l-infrastruttura fiżika u soċjali diġà tinsab taħt pressjoni kbira. Mingħajr ippjanar u ħsieb, din se tkun ferm aktar diffiċli.
Bl-infrastruttura fiżika qiegħed nifhem il-ħtieġa li jkollna toroq aħjar u aktar wesgħin minħabba l-ammont ta’ traffiku (dan ifisser li jkollhom jispiċċaw diversi spazji għall-parkeġġ fit-toroq prinċipali, b’mod partikulari Triq Sant’Andrija u Triq San Ġorġ), sistema ta’ drenaġġ aħjar, bankini aktar wesgħin minħabba l-ammont ta’ nies, ġbir ta’ skart (din hija l-ikbar problema li l-Kunsill għandu minħabba n-nuqqas ta’ responsabbiltà ta’ xi wħud), aktar spazju ta’ parkeġġ għall-karozzi, u postijiet miftuħa biex jilqgħu lil dawk li jiġu fostna.
Min-naħa l-oħra, b’infrastruttura soċjali qiegħed nifhem il-ħtieġa li jkollna aktar preżenza ta’ pulizija fit-toroq prinċipali (ilkoll nisimgħu b’diversi stejjer ta’ serq, ġlied u anke qtil f’din il-lokalità), tniġġis ikkawżat mill-istorbju, ħtieġa ta’ għassa tal-pulizija u klinika f’Paceville, vandaliżmu u aktar sigurtà għall-anzjani tagħna.
Jekk dawn il-proposti ta’ żvilupp mhumiex se jagħtu attenzjoni lil dawn l-elementi, allura se jkun hawn babiljona sħiħa.
Barra minn hekk, tajjeb li wieħed jiġbed l-attenzjoni li dawn il-proġetti jieħdu diversi snin biex jinbnew. Fil-fatt, Pender Gardens diġà ilu madwar seba’ snin tiela’ u għadu mhux lest. Allura dawn l-iżviluppi kollha kemm se jieħdu żmien biex jinbnew kollha? Dan mhuwiex se jwassal biex din il-lokalità tkun donnha zona ta’ bini għal diversi snin? Dan ifisser li se nagħmlu snin ngħixu fi sħaba ta’ trab li kull żvilupp iġib miegħu? Dan se jwassal biex il-proprjetajiet tagħna li għamilna sforz u investiment kbir biex ikollna se jispiċċaw jitilfu s-saħħa tagħhom? Dan ma jfissirx inkonvenjent kbir għar-residenti? Huwa veru li l-ekonomija hija importanti imma l-ħarsien tad-drittijiet tar-residenti, b’mod partikulari ta’ diversi anzjani tagħna, hija importanti wkoll.
Għaldaqstant, qiegħed ningħaqad ma’ diversi oħrajn biex nitlob li qabel ma jkun hemm deċiżjoni fuq dawn il-proġetti, ikun hemm masterplan ħolistiku. B’masterplan qiegħed nifhem li jkun hemm pjan wiesa’ li jqis kollox – żvilupp, il-madwar, l-infrastruttura, ir-residenti u l-lokalitajiet l-oħra li jmissu magħna.
Dan l-iżvilupp se jħalli wkoll impatt kbir mhux biss fuqna li ngħixu f’din il-lokalità imma wkoll fuq ir-residenti ta’ lokalitajiet viċin bħalma huma s-Swieqi, Tas-Sliema, Pembroke, il-Gżira u San Ġwann. Huwa importanti li dan il-masterplan ikun mibni fuq dak li huwa msejjaħ impact assessment.
S’issa, il-Gvern Laburista l-unika vuċi li qiegħed jisma’ hija dik tal-iżviluppaturi u ta’ dawk li kien miftiehem magħhom fil-raba’ sular qabel l-elezzjoni li għaddiet! Dan ma għandux ikun. Dan mhuwiex fl-interess nazzjonali.
Għaldaqstant, inħoss li jekk verament il-Gvern irid jitwemmen meta jisħaq li huwa Gvern li jisma’, iwaqqaf temporanjament kull talba li preżentement qiegħda ssir u jagħmel l-istudji meħtieġa.
(Dan l-artiklu ġie ippublikat fuq il-gazzetta Il-Mument – 19 ta' Ġunju, 2016)
Comments