Il-problema issa ma għadiex jisimha Konrad Mizzi jew Keith Schembri. Bit-tgħawwiġ tal-verità, din il-problema bdiet tissejjaħ Joseph Muscat.
Meta kont daqsxejn ta’ tfajjel, fil-primarja, l-għalliema mhux l-ewwel darba li kienet tagħtina biex niktbu xi komponiment fuq xi tema jew oħra. Ta’ tfajjel li kont, mhux lewwel darba li ma żammejtx mas-suġġett magħżul mill-għalliema. Kont nispiċċa nikteb fuq xi suġġett li ma kellu x’jaqsam xejn mat-tema magħżula. L-għalliema mbagħad kienet tagħtini l-pitazz lura u tikteb b’ittri kbar li kont out of point – ħriġt barra mis-suġġett magħżul!
Nhar it-Tnejn kienu diversi dawk li segwew il-maratona ta’ diskussjoni mill-Parlament fuq il-mozzjoni mressqa mill-Oppożizzjoni. Kienet maratona ta’ 13-il siegħa ta’ diskussjoni. Kienet mozzjoni dwar vot ta’ sfiduċja fil-Gvern ta’ Joseph Muscat. Din il-mozzjoni ta’ sfiduċja ma kinitx waħda b’kapriċċ. Din il-mozzjoni ma kinitx biss minħabba l-iskandlu tal-kontijiet sigrieti li nkixfu li għandhom il-Ministru Mizzi u Keith Schembri, imma kienet ukoll dwar kif il-Prim Ministru, wara tmien ġimgħat sħaħ, għadu ma ħa l-ebda azzjoni. Għal diversi drabi l-Prim Ministru stqarr li se jieħu azzjoni imma s’issa għadu ma ħa l-ebda pass! Dan jistona bil-kbir ma’ pajjiżi oħrajn (anke fejn id-demokrazija mhix daqshekk b’saħħitha) hekk kif dawn ħadu azzjoni mill-ewwel.
Għalhekk, il-mozzjoni ta’ sfiduċja kienet minħabba li Joseph Muscat, bħala Prim Ministru, minflok kien is-soluzzjoni billi talab ir-riżenja tagħhom, spiċċa biex ikun parti minn din ilproblema. Il-problema issa ma għadhiex jisimha Konrad Mizzi jew Keith Schembri.
Bin-nuqqas ta’ azzjoni, tkaxkir tas-saqajn u tgħawwiġ talverit., din il-problema issa bdiet tissejjaħ Joseph Muscat. Esponenti fl-istess Partit Laburista stqarrew dan. Għalhekk il-Partit Nazzjonalista b’sens qawwi ta’ dover lejn l-interess ta’ pajjiżna ħass li l-pożizzjoni ta’ Joseph Muscat bħala Prim Ministru ma kinitx aktar tenibbli. Għaldaqstant, ilmozzjoni ta’ sfiduċja kienet dwar in-nuqqas ta’ azzjoni tal- Prim Ministru u dell tqil ta’ korruzzjoni li ntefa’ fuqu u fuq it-tmexxija tal-Gvern tiegħu. Il-Partit Nazzjonalista ma riedx li jkun hemm elezzjoni bikrija. Il-Gvern għandu mandat ċar ta’ tmexxija. Simon Busuttil kien ċar fuq dan. L-għan tal-mozzjoni kien wieħed. B’dawn l-aħħar żviluppi fuq l-iskandlu Panama Papers, Joseph Muscat tilef kull awtorità morali li jmexxi lil dan il-pajjiż. Għaldaqstant, Joseph Muscat għandu jwarrab. “Barra!”, kienet l-għajta tal-poplu miġbur quddiem Kastilja.
Permezz ta’ din il-mozzjoni ta’ sfiduċja, il-Partit Nazzjonalista wassal din l-għajta fil-Parlament.
Għalkemm il-kelliema Nazzjonalisti kienu kollha ċari fuq dan il-punt u, kif jgħidu bl-Ingliż, to the point, ma jistax jingħad l-istess għall-kelliema Laburisti. L-ebda kelliem Laburista ma kellu d-diċenza jitkellem ċar fuq l-skandlu tal-Pananama, l-immoralità ta’ min fetaħ dawn il-kontijiet, l-inġustizzja soċjali ta’ min jevita l-ħlas tat-taxxa, il-pjaga tal-ħasil tal-flus, fuq il-ħtieġa li jkun hawn moralità fiskali, il-ħsara kbira fuq l-istituzzjonijiet finanzjarji tagħna, id-dell ikrah li ntefa’ fuq pajjiżna u fuq in-nuqqas ta’ tmexxija għaqlija tal-Prim Ministru.
Mhux hekk biss. Il-kelliema Laburisti spiċċaw fl-eloġju ta’ tifħir personali lil Joseph Muscat. Forsi l-kelliema Laburisti ħassew il-bżonn li jinċensaw kemm jifilħu lil Joseph Muscat għax mill-aħħar stħarriġ pubbliku jidher li dan tilef drastikament il-fiduċja tal-poplu? L-intervent tal-Prim Ministru kien qasir u aggressiv, u jikxef persuna li tinsab daharha mal-ħajt.
Min-naħa l-oħra, l-intervent ta’ Simon Busuttil kien ċar. Aktar ma jgħaddi ż-żmien, għal min iħobb l-onestà u l-integrità, Simon Busuttil aktar qiegħed joħroġ bħala mexxej alternattiv. Tkellem b’sens qawwi ta’ awtorità morali. Ġab argument wara ieħor biex iwassal messaġġ li l-Gvern ta’ Joseph Muscat mhux biss tilef l-awtorità morali imma jinsab fi state of denial jiġifieri meta wieħed ikun qiegħed fi stat li jiċħad ir-realtà tiegħu stess u tant il-persuna tkun qed tiċħad li tispiċċa temmen lilha nnifisha!
Il-Gvern Laburista rebaħ il-vot ta’ fiduċja kif mistenni. Imma tajjeb ngħidu li dan il-Gvern rebaħ dan il-vot b’maġġoranza ta’ siġġijiet li ma għadhiex riflessa fl-opinjoni pubblika! Il-maġġoranza li għandu fil-Parlament ma għadhiex teżisti fir-realtà. Għalkemm il-Gvern rebaħ il-vot, kompla tilef voti u l-fiduċja ta’ dawk il-persuni onesti li jaħdmu u jħallsu t-taxxi sal-aħħar ċenteżmu ta’ ewro.
Il-Partit Nazzjonalista, bil-vot tiegħu kien mill-ġdid fuq in-naħa t-tajba tal-istorja.
Il-Partit Laburista, bil-vot tiegħu jinsab out of point malpoplu Malti u Għawdxi onest.
(Dan l-artiklu ġie ippublikat fuq il-gazzetta Il-Mument – 24 ta' April, 2016)
Comments