Il-Partit Laburista għalkemm kien jiftaħar li għandu roadmap għall-housing u kien dejjem jikkritika lill-Gvern Nazzjonalista, spiċċa li wara erba' snin lanqas kellu l-ħila mhux biss jibni appartament wieħed biss, imma lanqas ħareġ skema waħda.
Din l-elezzjoni ġeneralimhix elezzjoni normali. Din lelezzjoni bikrija qiegħda tissejjaħ għax Joseph Muscat, sena qabel ma spiċċa t-terminu tiegħu, qiegħed jaħseb li jista’ jgħatti x-xemx bl-għarbiel. Din l-elezzjoni qiegħda tissejjaħ minħabba t-tsunami sħiħ ta’korruzzjoni li qiegħed jiffaċċja dan il-Gvern.
S’issa l-PN diġà ħareġ diversi proposti li jolqtu mill-qrib lin-nies. Dawn il-proposti huma frott diversi dokumenti li l-Partit ħareġ matul dawn l-aħħar erba’ snin.
Il-Partit Laburista għalkemm qabel l-elezzjoni kien jiftaħar li għandu roadmap għall-housing u kien dejjem jikkritika lill-Gvern Nazzjonalista, spiċċa li wara erba’ snin lanqas kellu l-ħila mhux biss jibni appartament wieħed biss, imma lanqas ħareġ skema waħda. Fost dawn il-proposti hemm proposti għal dawk li qegħdin filbżonn ta’ akkomodazzjoni soċjali. Fid-dawl tal-fatt li għal ċertu żmien kont Kap Eżekuttiv tal-Awtorità tad-Djar u kont imdaħħal ukoll fit-tfassil ta’dawn il-proposti, nixtieq naqsam fil-qosor dawn il-proposti. Dawn huma:
1. Inwettqu proġetti ġodda ta’ housing soċjali Gvern ġdid Nazzjonalista se jibda minnufih programm ta’ bini ta’ appartamenti ġodda tal-Gvern għal familji u koppji żgħażagħ. Il-PN jara li jinvolvi lill-privat f’dawn il-proġetti, anki permezz ta’Private Public Partnerships.
2. Inreġġgħu lura ż-żieda fuq il-kera Il-PN qiegħed jintrabat li jreġġa’ lura ż-żieda fuq il-kera tal-housing soċjali. Din hija waħda mill-miżuri antisoċjali li daħħal Joseph Muscat.
3. Nikru mill-privat għas-social housing Taħt Gvern ġdid Nazzjonalista, l-Awtorità tad-Djar terġa’ tibda tikri mingħand il-privat sabiex tkun tista’ tagħti b’sussidju akkomodazzjoni soċjali lil min verament għandu bżonn. Matul il-Gvern Nazzjonalista kien hemm skema msejħa Skema Kiri, u madwar 600 appartament kienu nkrew mill-privat u ngħataw b’sussidju qawwi lil persuni fuq il-lista tal-housing.
4. Inżidu s-sussidju għal min jikri mill-privat Il-Gvern Nazzjonalista jirrevedi l-iskema tas-sussidju tal-kera biex aktar persuni jibbenefikaw minn sussidju, u sussidju ġust.
5. Nieħdu ħsieb l-anzjani f’riskju li jispiċċaw bla saqaf Kategorija ta’ nies, b’mod speċjali anzjani, li minħabba deċiżjonijiet reċenti tal-Qorti Kostituzzjonali, jinsabu f’riskju li jispiċċaw bla saqaf fuq rashom se jingħataw l-għajnuna.
6. Nagħtu sussidju fuq l-interessi tal-loan tad-dar Gvern ġdid Nazzjonalista se jintroduċi skema innovattiva ta’ sussidju jew tax credit fuq l-interessi tal-loan tad-dar. B’hekk, il-Gvern jissussidja l-interessi li l-koppji jħallsu fuq il-loan tal-ewwel dar tagħhom permezz ta’ sussidju dirett jew tnaqqis ta’ taxxa fil-forma ta’ tax credit skont id-dħul tagħhom.
7. Neżentaw mit-taxxa l-kera meta post jinkera lil xi ħadd li għandu bżonn housing Gvern ġdid Nazzjonalista se jeżenta lil dawk li jikru post, kif ukoll lil min qiegħed fuq il-lista jistenna housing, mill-income tax fuq id-dħul minn kera. Dan isir bil-kundizzjoni li l-kera tiġi ffissata fuq perjodu ta’ żmien ta’għaxar snin.
8. Inħallsu lil min itteħditlu l-art tiegħu fil-passat Simon Busuttil stqarr li wasal iż-żmien li jiġu indirizzati dawk ilpersuni li għadhom jistennew kumpens mill-Gvern fuq proprjetà. Huwa qal li Gvern immexxi minnu se jara li l-profitti magħmula mill-Awtorità tal-Artijiet jiġu riservati biex jintużaw biss biex jitħallas min itteħditlu l-art fil-passat u għadu sal-lum ma ngħatax kumpens.
9. Inċentiv għall-first time buyers għaż-żgħażagħ Il-Kap tal-Partit Nazzjonalista qal li Gvern ġdid se jżomm l-inċentiv preżenti għall-first time buyers ta’ eżenzjoni mit-taxxa sal-valur ta’ €150,000 iżda se jestendiha wkoll għal persuni li jkunu għadhom kif isseparaw jew iddivorzjaw u li għandhom bżonn jixtru proprjetà oħra fejn joqogħdu.
10. Għajnuna lill-NGOs li jipprovdu servizz għall-homeless Gvern ġdid Nazzjonalista huwa impenjat li jsostni b’mod konkret lill-NGOs li jipprovdu servizz lill-homeless b’diversi miżuri fosthom għajnuna finanzjarja, sussidji, tnaqqis fil-kontijiet tad-dawl u ilma u billi jiżdiedu b’mod xieraq is-servizzi ta’ social u community workers.
Dawn huma proposti serji. Dawn huma proposti li juru li l-PN għandu mhux biss għal qalbu l-interess tan-nies imma qiegħed iħoss il-polz taċ-ċittadini. Għalhekk jien se nagħżel lil Malta.
(Dan l-artiklu ġie ippublikat fuq il-gazzetta Il-Mument – 21 ta' Mejju, 2017)
Comentarios