X’serħan tal-moħħ se jingħata lir-residenti biex dawn jibqgħu jserrħu rashom li huma fis-sigur?
Din hija l-mistoqsija li għamilt fl-aġġornament li għamilt f’din il-gimgħa meta tkellimnt fuq il-proġett propost minn Project Green f’San Ġwann quddiem u madwar il-Knisja.
Tajjeb li ngħid li din il-proposta qegħda tkompli fuq proġett ieħor li kien sar fl-2019 – 04644/96 fejn kienu saru l-ġnien u l-bandli Karen Grech u l-car park f’Misraħ Lewża. Quddiem din il-proposta wieħed ma jistax ma jaqbilx anke fid-dawl li Malta saret ‘one construction site’.
Imma filwaqt li hemm qbil fil-prinċipju fuq dan il-proġett, b’mod responsabbli nixtieq nwassal numru ta’ osservazzjonijiet. Fid-dawl li s’issa ma hemmx pjanti dettaljati aċċessibbli għall-pubbliku, għaldaqstant se nilimita lili nnifsi fuq il-fotomontaġġ provdut mill-istess Green Project.
Livelli
Fid-dawl li qed ikun propost li jkun hemm mina quddiem il-knisja li minnha ser jgħaddu anke l-karozzi tal-linja, dan jidher li se jwassal biex il-livell tal-open space propost ser jgħola. Jekk dan huwa minnu, kemm dan se jogħla? U jekk dan se jogħla dan se jwassal biex iz-zuntier tal-knisja se jkun aktar baxx? Se jkun hemm diżlivell b’tali mod li z-zuntier se jkun l-isfel… f’ħofra?
Aċċesibiltà
Skont il-fotomontaġġ, il-hearse tal-mejtin tista’ toqgħod fil-ġenb taz-zuntier. Dan ifisser li t-triq ser tidjiqq jew inkella hu z-zuntier li se jiċkien? X’inhuma l-pjanijiet għall-persuni b’diżabiltà/anżjani li sal-lum dawn jitwasslu sat-taraġ taz-zuntier? Dawn issa jridu jibdew jimxu mill-car park f’Pjazza Lewża sal-knisja?
Purċissjonijiet
Taqbel jew le dawn huma parti mir-ritwali reliġjuż u kulturali tagħna. Skont il-fotomontaġġ, ir-rottot ta’ dawn il-purċissjonijet jridu jinbidlu kompletament għaliex m’hemmx aċċess biex dawn jgħaddu. Kien qbil ma dawk li jorganizzaw dawn il-purċissjonijiet u mal-għaqda tal-armar?
Skavar
Skont il-proposta se jkun hemm mina u underground car park. Tajjeb li l-car park ser ikun taħt l-art. Imma sar studju – technical geological report – fuq il-pedament tal-knisja fid-dawl li se jkun hemm skavar ta’ madwar 2/3 sulari taħt l-art kemm quddiem u mal-ġenb tagħha? Infakkar li l-knisja mbniet fis-snin ħamsin. Min ser jagħmel tajjeb għal kull eventwalità ta’ ħsara jew konsenturi għal knisja?
L-istess mistoqsija nagħmel għal binja tal-Housing Estate f’Misraħ Lewża. Il-pedamenti jifilħu għal dan l-iskavar? Meta kont CEO tal-Housing u riddna nibnu sular ieħor fuq dak li hemm, il-parrir kien li aħjar li le għaliex il-pedamenti ma jifilħux aktar piż! Dan għadu jgħodd? Green Project tkellmet mal-Housing Authority fuq dan ir-rapport? X’serħan tal-moħħ ser jingħata lir-residenti biex dawn jibqgħu jserrħu rashom li huma fis-sigur?
Waqt l-unika laqgħa pubblika li saret intużat l-espressjoni li waqt ix-xogħolijiet se jkun hemm ‘displacement’ tan-nies. Jista’ wieħed ifisser x’wieħed għandu jifhem b’‘displacement tan-nies’? Ifisser li r-residenti ser jintalbu joħorġu minn djarhom matul dan il-proġett, li skont Project Green ser jieħu mill-lanqas erba’ snin?
Carpark
Skont il-fotomontaġġ id-dħul/ħruġ se jkun mit-Triq Felice Borg. Dan ifisser li kull min irid jidħol fil-car park, irid jgħaddi mit-toroq li s’issa huma kwieti bħal Triq il-Ġibjun u Triq iċ-Ċawsli. Dan ifisser li se jkun hemm żieda tat-traffiku għal dawn ir-residenti?
Kunsultazzjoni
Filwaqt li l-Gvern qal li saru kunsultazzjoni wiesgħa, il-maġġoranza ta’ dawk preżenti ma qablux.
Filwaqt li l-Kunsill Lokali qal li hemm qbil, s’issa l-proposta qatt ma kienet uffiċjalment ‘item’ fuq l-aġenda u lanqas ma kien hemm vot uffiċjali fuq il-pjanta finali. Għalkemm il-Kunsill iddiskuta din il-proposta fi 2022 u kien hemm qbil fi prinċipju, il-Kunsill naqas li jtella’ l-proposta finali fuq l-aġenda u jieħu vot finali. Hemm differenza bejn li wieħed jiddiskuti proposta u l-proposta finali.
S’issa ukoll ma hemmx PA number u lanqas tabella ta’ avviż. Infakkar li applikazzjoni tibda tgħodd meta jkun hemm PA number. Il-perjodu fejn il-pubbliku jista’ jagħti l-fehma tiegħu huwa bil-liġi ta’ tletin jum.
Time frame
Il-Gvern qal li dan se jdum erba’ snin. Għalkemm dan diġa hu ħafna u se jfisser tbatija għal diversi imma wieħed jieħu din id-data ‘with a pinch of salt’. Il-Gvern mhux kredibbli meta tħares li l-proġett tat-terminal fil-Ferries/Sliema ilu ħames snin u l-pjazza proposta fi Spinola ilha tlett snin u ma sar xejn!
Konklusjoni
Filwaqt li nifhem li l-Gvern għandu certa għaġla fid-dawl li f’Ġunju li ġej hemm l-elezzjonijiet tal-Kunsill u jixtieq jagħmel propoganda u bżar, imma tajjeb li jiftakar dak li jgħid il-Malti: ‘Qattusa għaġġelija, frieħ għomja tagħmel’!
Filwaqt li naqblu fi prinċipju, imma hemm bżonn aktar kunsultazzjonijiet ma’ kulħadd u aktar ħsieb!!
(Dan l-artiklu ġie ippublikat fuq il-gazzetta Il-Mument – 8 t' Ottubru, 2023)
Comments