Il-qtil makabru ta' Daphne Caruana Galizia twettaq f'kultura ta' xejn mhux xejn.
Dan huwa l-isem ta’ sensiela ta’ kotba miktuba mill-mibki Herbert Ganado. Għal min forsi ma jafx, Ganado kien politiku li fiż-żmien il-gwerra kien ġie internat mill-Ingliżi fl-Uganda. Meta huwa reġa’ lura wara snin fl-eżilju, Ganado ra Malta ferm differenti. Ganado seta’ jinnota t-tajjeb li kien sar imma anke l-ħażin.
Anke jien rajt Malta tinbidel. Fi 53 sena rajt ħafna affarijiet jinbidlu. Matul it-tfulija u ż-żgħożija tiegħi konna ngħixu fiż-żmien meta Mintoff kien jiggverna b’mentalità Soċjalista, magħluqa u aggressiva. Matul dawn iż-żminijiet għalkemm nistqarr li Mintoff wettaq ukoll affarijiet ta’ ġid għas-soċjetà, kienu żminijiet koroh.
Min għandu żmien daqsi jew aktar minni lkoll niftakru l-klima tqila li kellna. Ilkoll niftakru meta kulħadd kien imbeżża’ u wieħed ma setax juri fehmtu fil-beraħ. Ilkoll niftakru l-aggressività Soċjalista, is-swat, it-transfers, il-ġlied mal-għalliema, mat-tobba, mal-Knisja. Ilkoll niftakru l-qtil ta’ Raymond Caruana. Kienu tassew żminijiet tad-dlam.
U meta fl-aħħar is-sewwa rebaħ u tela’ l-Partit Nazzjonalista fit-tmexxija, rajt lil Malta terġa’ tinbidel għal
soċjetà miftuħa b’direzzjoni ċara. Għalkemm matul is-snin ta’ amministrazzjoni Nazzjonalista saru diversi żbalji, ilkoll naqblu li l-pajjiż għamel passi ta’ ġgant ’il quddiem f’diversi oqsma. Ilkoll naqblu li Malta nbidlet mil-lejl għan-nhar. Ilkoll naqblu li għaliex kellna mexxejja b’vokazzjoni politika ġenwina, Malta ħadet ir-ruħ. Malta għaddiet minn rivoluzzjoni sħiħa imma siekta. Kulħadd seta’ jgħix fil-kwiet. Kulħadd ingħata ċans li jekk irid jista’ jimxi ’l quddiem. Permezz ta’ investiment qawwi fl-infrastruttura edukattiva, il-ġenerazzjoni żagħżugħa laħqet l-aspirazzjonijiet tagħha. Il-milja ta’ din ir-rivoluzzjoni kienet meta Malta ssieħbet fil- Komunità Ewropea.
Fl-2013, Joseph Muscat kien wiegħed b’mod l-aktar solenni li huwa kien se jagħmel bidla akbar f’pajjiżna.
Għalkemm matul dawn l-erba’ snin, il-Gvern Laburista verament għamel passi ’l quddiem f’diversi oqsma u anke kompla jsaħħaħ u jibni fuq dak li kien hemm, inħoss li l- Gvern Laburista wettaq l-akbar bidla fil-ħażin li qiegħda tħalli frott ikrah fostna.
Fl-aħħar erba’ snin, il-Gvern Laburista ħajjar il-kultura ta’ xejn mhu xejn, li kollox jgħaddi, li kollox għandu prezz li jista’ jinxtara. F’dawn is-snin wettaq politika li dawk li huma viċin tiegħu tawhom li riedu u ħadd ma jista’ għalihom. Joseph Muscat wettaq politika fejn nawwar l-istituzzjonijiet fundamentali tagħna, tant li l-Prim Imħallef kellu juża kliem iebes li ma jistax ikun li pajjiżna ma jkunx immexxi mis-saltna tal-liġi u l-ġustizzja. Tkellem bl-aktar mod ċar li pajjiżna ma jistax ikun jispiċċa ġungla, fejn min huwa ‘b’saħħtu’ jista’ jagħmel li jrid!
Il-qtil makabru ta’ Daphne Caruna Galizia twettaq f’kultura ta’ xejn mhux xejn. Il-qtil ta’ Daphne huwa eżempju ċar ta’ meta pajjiżna jitlef il-fibra morali tiegħu. Għal diversi snin u anke fl-aħħar ġimgħat sfortunatament kienu diversi, anke minn fostna, li għażlu li lil Daphne jattakkawha għax kellha l-kuraġġ li titkellem. Diversi kellhom il-hashtag ‘Barra’. Issa, veru tinsab barra! Huwa minnu li forsi wieħed mhux dejjem qabel mal-istil u mal-kontenut, imma żgur li dan ma jiġġustifikax dan l-att terroristiku. Nemmen li dan il-qtil barbaru huwa eżempju ta’ dak li sejjer ħażin f’pajjiżna. Għalkemm pajjiżna rreġistra s-surplus ekonomiku, min-naħa l-oħra qiegħed jirreġistra defiċit morali!
Il-qtil ta’ Daphne qed iwassal messaġġ li l-verit., l-onestà, is-serjetà, il-governanza tajba u ġustizzja mhux biss mhumiex apprezzati iżjed, imma huwa għajb għal min jipprova jaħdem biex toħroġ il-verità u ssaltan il-ġustizzja! Il-messaġġ huwa wieħed ċar: jekk wieħed jipprova jsus biex jiskopri l-verità u jikxef l-ingann, jispiċċa mtajjar! Huwa għalhekk li dan il-qtil qiegħed jissejjaħ qtil politiku. U kien għalhekk li l-PN qiegħed jitfa’ r-responsabbiltà politika fuq spallejn il-Gvern Laburista, għax kien il-Gvern li mhux biss ma għamel xejn biex dan id-delitt ma jseħħx, imma kien responsabbli biex ikun hawn klima u kultura ta’ impunità – li kollox jgħaddi u jgħodd.
Dan il-qtil se jkompli jbiddel lil Malta. Quddiem din issitwazzjoni gravi aħna l-Maltin nistgħu nagħżlu waħda minn żewġ toroq. Nistgħu jew ninħakmu mill-biża’, inkella nsibu l-kuraġġ u ssemmgħu leħinna.
Huma diversi dawk li quddiem din it-traġedja se jkunu qegħdin jibżgħu għal ġildhom. Jafu li jekk wieħed jitkellem se jispiċċa ħażin. Iżda jekk wieħed iħalli l-biża’ jaħkmu, allura min jixtieq jiddomina fuqna jkun rebaħ bil-kbir. Jien nagħżel li nsemma’ leħni! Jien nagħżel li ma nibżax naħdem ma’ oħrajn biex ngħixu f’soċjet. fejn is-saltna tal-ġustizzja u d-dritt ikollhom post prinċipali fil-ħajja tas-soċjetà tagħna. Jien għalhekk dħalt fil-politika u għalhekk ukoll se nikkontesta għal kariga ta’ membru tal-Eżekuttiv tal-Partit. Nemmen fil-politika tal-valuri. Nemmen fil-politika tas-sewwa u l-verità. Nemmen fil-politika li tagħti libertà sħiħa lil kull persuna biex twassal il-messaġġ tagħha mingħajr biża’ u theddid.
Jalla aħna ċ-ċittadini ta’ rieda tajba filwaqt li nitnikktu b’dan il-qtil, insibu d-determinazzjoni li nkomplu l-mixja tagħna għall-verità u s-sewwa!
F’ismi u f’isem diversi oħra nixtieq inwassal il-kondoljanzi sinċiera lill-familja kollha tagħha.
(Dan l-artiklu ġie ippublikat fuq il-gazzetta Il-Mument – 22 ta' Ottubru, 2017)
Comentarios