Filwaqt li l-Partit Laburista jilgħabha tal-eroj tal-ħaddiema u l-vulnerabbli, tal-qalba qegħdin jitħanżru u jiffangaw minn fuq dar il-poplu.
Ilkoll qrajna dak li qalet Rosianne Cutajar, ex Deputata tal-Partit Laburista.
Meta din kienet għadha membru u qabel ma ntalbet biex tirriżenja bħala membru tal-Partit Laburista, Rosianne kienet daħlet f’komunikazzjoni ma’ Yorgen Fenech. Preżentament, Yorgen Fenech qiegħed allegatament ikunu akkuzat b’rabta mal-qtil brutali tal-ġurnalista Daphne Caruana Galizia. Matul din il-konversazzjoni fuq WhatsApp, Rosianne infexxet tgħid li diversi membri tal-partit/gvern Laburista u dawk ta’ madwarhom kienu qegħdin jitħanżru billi jiffangaw f’diversi impjiegi, postions of trust u li dawn kollha kienu qed jaqilgħuha tajjeb mill-flus pubbliċi.
Din il-ġimgħa li għaddiet ħarġet aħbar li jagħti raġun lil Rosianne meta qalet li kulħadd qiegħed jitħanżer.
Għalkemm ilna nisimgħu b’diversi stejjer ta’ korruzzjoni u ta’ persuni qrib il-Labour li qegħdin jagħmlu dan, din il-ġimgħa ħarġet l-aħbar minn The Shift News – għadqa ta’ ġurnalisti independenti – li ċertu David Curmi, li preżentament huwa c-Chairman Eżekuttiv tal-Air Malta, qiegħed jitħallas €21,500 fix-xahar. Qrajt tajjeb! Ħareġ lis-Sur Curmi jitħallas €21,000 fix-xahar, barra xi perkiċċi u allowances oħra! Dan ifisser lis-Sur Curmi jaqla’ €258,000 fis-sena. Fid-dawl li dan il-kuntratt ta’ impjieg huwa għal tlett snin, dan ifisser li n-nefqa totali ser tkun ta’ €777,000, jiġifieri żewġ terzi ta’ miljun.
Għalkemm nifhem li ċertu rwoli ta’ ħidma jġorru magħhom salarji partikolari minħabba r-responsabbiltà li dawn ikollhom, inħoss li dan is-salarju huwa wieħed xokkanti, skandaluż u oxxen.
U ngħid għaliex ukoll.
Ministru li jonqos lill-Parlament
Għal diversi drabi, il-Ministru Clyde Caruana, Ministru tal-Finanzi, kien mitlub iwieġeb għal mistoqsijijiet parlamentari jekk is-Sur Curmi hux qiegħed jitħallas jew le, u jekk iva, kemm kienet il-paga tiegħu. Għal divesi drabi, il-Ministru ħarab milli jwieġeb. Fl-aħħar, permezz tad-dritt għal informazzjoni mitluba minn The Shift, ħareġ li dan mhux biss jitħallas imma jitħallas sew kull xahar!
Dan ifisser li l-Ministru naqas lil Parlament u żgwida lill-Kamra. Din hija aħbar xokkanti. Dan huwa insult lil-ogħla uffiċċju tad-demokrazija tagħna. Kien tajjeb għalhekk li l-PN talab lil kummissarju tal-Istandards biex jara dan il-ksur ta’ etika min naħa tal-Ministru. Mhux aċċettabli li membru tal-Kabinett jonqos li jgħid il-verità kollha lill-Parlament.
Salarju skandaluż
Filwaqt li nerġa’ ntenni li ċertu ħatriet iġorru salarji ġenerużi, imma wieħed irid jifhem li dan huwa chairman li fi kliemu stess, l-Air Malta kellha mismanagment ta’ fondi, kriżi ta’ numru ta’ ħaddiema u li kien hemm bżonn jitnaqqsu l-ispejjeż, fosthom pagi tal-ħaddiema! Fil-fatt, dan l-aħħar kien hemm diversi skemi ta’ rtirar kmieni biex ħaddiema jitilqu minn ma’ l-Air Malta! Mela, jekk l-Air Malta tinsab fi kriżi finanzjarja, kemm kien għaqli li wieħed jimpjega persuna b’dan is-salarju? Huwa ġust li filwaqt li diversi ħaddiema kellhom jitkeċċew bil-pulit, u dan sar anke bi spiża mill-fondi pubbliċi, is-Sur Curmi jkollu dan is-salarju ta’ €21,500 fix-xahar!
Min-naħa l-oħra, jekk wieħed jasal biex jaċċetta li s-Sur Curmi jitħallas dan l-ammont, nistenna li b’din il-paga allura jara li jsalva lil Air Malta! Jekk din hija l-paga li kellna nħallsu biex insalvaw il-kumpanija tal-arju, li tajjeb li ngħidu dak li qalu diversi, fosthom MHRA, li l-Air Malta hija neċessarja biex ikollna t-turisti fostna, allura kien hemm bżonn li nħallsu dan is-salarju. Imma ngħid jien, biex inħallsu dan is-salarju u nispiċċaw li l-Air Malta tingħalaq, allura dan mhux biss mhux aċċettabbli imma huwa flus fil-ħela!
Mela fil-passat kellna lil mara ta’ Konrad Mizzi li kienet taqla’ €13,000 fix-xahar u ma ġabet xejn lejn pajjiżna (u għandna ma nafux jekk din għadhiex taħdem/taqla’ din il-paga. Għalkemm għamilt mistoqsija parlamentari, s’issa għandi mingħajr risposta. Fid-dawl li l-Parlament jinsab sospiż għal vaganzi tas-sajf, allura rrid nistenna meta dan jerġa’ jiftaħ biex forsi ikolli risposta!), u issa għandha lis-Sur Curmi jpappiha sew!
Salarju oxxen
Mhux biss dan is-salarju huwa wieħed xokkanti imma wkoll oxxen fid-dawl li meta wieħed iqabbel dan ma’ dħul ma’ salarji ta’ dawk ta’ diversi ċittadini Maltin. Tajjeb li ngħid li filwaqt lis-Sur Curmi jaqla’ €21,500 fix-XAHAR, hawn diversi li dan is-salarju ma jaqilgħuhx f’sena waħda biss! U dan mhux qiegħed ngħidu għal unskilled workers imma anke għal numru ta’ professjonisti, fosthom għalliema! Hawn għalliema li lanqas dan l-ammont ma jaqilgħu f’idejhom f’sena!
Mhux hekk biss. Hawn kważi 100,000 ċittadini Maltin li f’sena ma jaqilgħux ’il fuq minn €10,000 fis-sena! Fil-fatt, wieħed minn kull tlett anżjani jinsabu fil-faqar jew f’riskju ta’ faqar. Wieħed minn kull ħames ċittadini Maltin li huma fl-istess baħar! Dan qed iwassal għal diversi li jkollhom livell ta’ għajxien baxx.
Dan joħroġ mhux biss l-inġustizzja u l-inegwaljanza soċjali f’pajjiżna, imma joħroġ l-ipokreżija tal-Partit Laburista.
Filwaqt li l-Partit Laburista jilgħabha tal-eroj tal-ħaddiema u l-vulernabbli, dawk tal-qalba qegħdin jitħanżru u jiffangaw minn fuq dar il-poplu.
Għal darba, Rosianne kellha raġun!!
(Dan l-artiklu ġie ippublikat fuq il-gazzetta Il-Mument – 6 t' Awwissu, 2023)
Comments