Il-vjolenza twelled il-vjolenza. Il-vjolenza qatt ma ġabet paċi.
Fl-ewwel aġġoranment tiegħi fil-Parlament għal din is-sena l-ġdida, fejn kull deputat ta’ naħa jew oħra, jistgħu jitkellmu fuq liema suġġett li jridu, jiena ħassejt ir-responsabbiltà fil-kuxjenza li nitkellem fuq il-paċi. Għalija, is-silenzju huwa forma oħra ta’ kompliċità.
Bħala deputati hija r-responsabbiltà tagħna li nkunu bennejja, ambaxxaturi u strumenti ta’ paċi, aktar u aktar meta f’diversi postijiet hemm nuqqas ta’ paċi.
Allura ma nistax ma nitkellimx fuq il-qagħdha mwera li bħalissa qed iseħħ bejn l-Iżrael u l-Palestina, b’mod partikolari f’Gaza, bil-periku li dan l-inkwiet infirex f’artijiet oħra. Fil-fatt, f’dawn l-aħħar jiem kien hemm diversi attakki oħra f’positjiet oħra. Donnu li hemm min għandu nteress li din il-kwistjoni tkompli tinfirex ma’ positjiet oħra.
Mingħajr tlaqliq nistqarr li l-massakru tal-poplu Palestinjan f’Gaza mhuwiex aċċettabli għal kull min jirrispeta d-dinjità umana.
Xi ħadd forsi jgħidli: ‘Malta hija pajjiż newtrali, mhux affari tagħna’.
Min jgħid dan mhux biss jara biss sal-ponta ta’ mnieħru u jinsa li dan il-ġlied iħalli mpatt anke fuqna wkoll, speċjalment jista’ jwassal għal prodotti tal-ikel aktar għoljin IMMA n-newtralità tagħna ma tfissirx li nibqgħu ċassi quddiem il-ħazin, ma jfissirx li nagħlqu għajnejna quddiem dak li mhux sewwa u lanqas ma jfissir li ndawwru wiċċna quddiem dawn l-attroċitajiet li seħħu u qed jisseħħu.
Kif stqarr l-istess President George Vella, fl-aħħar diskors tiegħu f’Jum ir-Republika, meta tkellem fuq din it-traġedja: ‘Iż-żejjed kollu żejjed’, hekk ntenni jiena wkoll.
Ma għandi l-ebda problema nistqarr liż-żewġ naħat wettqu krimini tal-gwerrer fejn persuni innoċenti fuq iż-żewġ naħat ħalsu preżż b’ħajjithom.
Għaldaqsant, kif nikkundanna bla riserva l-attakk terroristiku mill-Ħamas li sar f’Ottubru tas-sena l-oħra (kif għamel ukoll dan il-Parlament), fejn mhux aċċettabli li persuni jinqatlu waqt li qed jiddevertu jew inkella waqt li huma miġbura ma’ wliedhom f’darhom IMMA bl-istess determinazzjoni nikkundana l-carpet bombing u l-massakru li qed iseħħ ġewwa Gaza.
Jekk 1,200 persuna f’Iżrael kienu brutalment maqtula u oħrajn ittieħdu priġunieri, kif nistgħu naċċettaw li jinqatlu ’l fuq minn 22,000 persuna, fosthom tfal u nisa innoċċenti?
Att terroristiku wieħed ma jiġġustifikax att terroristiku ieħor.
Jekk irridu nkunu konsistenti u kreddibli, ma nisgħtux naqħlqu għajnejja għal dan il-kalvarju tall-ġenoċidju.
Filwaqt li ngħaraf li Iżrael kellu/għandu dritt li jipproteġi lilu nnifsu, imma dan id-dritt ma jagħtihx liċenzja li jeqred pajjiż sħiħ.
Meta fil-passat il-grupp terroristiku IRA f’Irlanda kien wettaq att terroristiku, il-Gvernijiet Ingliżi ma kienux jibumbardaw Belfast kollu u joqtol eluf ta’ tfal u nisa innoċenti.
Sfortutament b’dan il-massakru, Iżrael qed jiżra żerriegħa għal aktar attakki futuri. Dawk it-tfal/żgħażagħ li huma trawmatizzati bil-mewt tal-għeżież tagħhom, xi wħud ser jaħsbu li l-unika mod kif juru l-uġiegħ tagħhom huwa li jwettqu atti oħra ta’ vjolenza!
Il-vjolenza twelled il-vjolenza. Il-vjolenza qatt ma ġabet paċi.
Il-kwistjoni tad-drittjiet tal-Palestinjani għal art tagħhom ilha kwistjoni pendenti għal diversi snin. Bħal ma nagħmlu tajjeb li niftakru fl-attroċitajiet tal-waħx li għadda minnu l-poplu Lhudi matul it-tieni gwerra mondjali minn idejn in-Nażisti, tajjeb li napprezzaw li l-poplu Palestinjan qieqħed ibati minn dan il-kalvarju.
Għaldaqstant, wasal il-mument li l-komunità internazzjonali/Parlament Malti naħdmu biex iż-żewġ naħat jifhmu li l-unika triq – diffiċli kemm hija diffiċli – hija dik li jkun hemm ‘two state solution’. Hija ħasra li l-estremisti fuq iż-żewġ naħat mhumiex jifhmu li ma hemmx triq oħra.
Ningħaqad mal-President tagħna meta qal: ‘nagħmel it-talba sinċiera tiegħi biex min bħalissa għandu s-saħħa f’idejh, iwaqqaf il-massakru’.
Għaldaqstant, il-messaġġ tiegħi huwa għal waqfien mill-ġlied u favur il-paċi.
Għalkemm ikun hemm xi wħud li juri d-dubji tagħhom imma mingħajr paċi m’hawnx stabbiltà u mingħajr stabbiltà m’hemmx livell ta’ għajxien li jirrispetta d-dinjità umana.
Kull familja u kull persuna, ’l hinn minn razza, ilsien, reliġjon, orjentazzjoni sesswali u kulur tal-ġilda jistħoqlu jgħix fil-paċi.
Shalom Iżrael, Salam Gaza.
(Dan l-artiklu ġie ippublikat fuq il-gazzetta Il-Mument – 21 ta' Jannar, 2024)
Comments