Huwa ġust u sew li waqt attività kummerċjali privata, jintużaw fondi pubbliċi biex jagħmlu tajjeb?
Il-ġimgħa li għaddiet kienet ġimgħa diffiċli għal diversi residenti f’San Ġiljan. Dan għaliex il-ġimgħa li għaddiet kienet iċċelebrata l-attività ta’ San Patrizju. Matul din il-‘festa’ huma diversi l-eluf li jiġu fostna u jispiċċaw jixorbu l-birra sakemm ma jarawx art!
Għalkemm ir-residenti ta’ San Ġiljan huma mdorrijin is-sena kollha b’diversi nies li jiġu biex jiddevertu, din l-attività qiegħda tkun, sena wara oħra, attività bla rażan u bla ebda responsabbiltà. Ir-residenti qegħdin jilmentaw li matul din il-‘festa’ mhux biss ma jkunux jistgħu jidħlu u lanqas joħorġu minn darhom, imma l-mużika tibqa’ tindaqq sa tard bil-lejl mingħajr ebda konsiderazzjoni għal dawk li huma anzjani jew morda. Residenti oħrajn jilmentaw minn ħmieġ li jitħalla waqt li residenti oħrajn jispiċċaw b’awrina u vomtu wara biebhom!
Nemmen bis-sħiħ li biex wieħed jieħu gost ma jistax idejjaq lil ħaddieħor. Ma jistax ikun li din il-‘festa’ tispiċċa okkażjoni biex kulħadd jagħmel li jrid u jġib ruħu kif irid! Min-naħa tal-Kunsill Lokali ma kienx qiegħed ikun sew lanqas li jispiċċa jħallas għal tindif u ġbir taż-żibel li jitħalla wara. Tajjeb li ngħid li s-sena l-oħra, il-Kunsill Lokali spiċċa biex ħallas mill-baġit tiegħu ’l fuq minn €3,000 biex naddaf mill-ġdid Pjazza Spinola u l-madwar tagħha. Dawn il-flus setgħu marru għal inizjattivi għall-ġid tal-komunità kollha.
Kien proprju għal din ir-raġuni li meta f’Ottubru li għadda l-Kunsill Lokali ta’ San Ġiljan irċieva talba mingħand organizzatur privat li kien lest li jorganizza, bi spejjeż għalih, il-Kunsill Lokali qabel li jilqa’ din it-talba. Il-kunsillieri kollha – inkluż dawk tal-Partit Laburista – aċċettaw li dan l-organizzatur jieħu ħsieb jikkordina din l-attività. Imma l-Kunsill Lokali rabat lil dan l-organizzatur b’diversi kundizzjonijiet, fosthom li jitħallew operaturi oħra biex ikollhom bars barra, li jarma 30 mobile toilet, li jkun hemm ambulanza, membri tas-sigurtà u li jnaddaf mhux biss Pjazza Spinola imma l-madwar kollu. B’hekk il-Kunsill Lokali kien qiegħed iserraħ rasu li din l-attività kienet taħt ċertu kontroll u li kien se jkun hemm l-indafa mingħajr spejjeż għall-Kunsill.
Dak li ġara wara huwa storja magħrufa minn kulħadd. Il-Kunsill Lokali ħass li peress li din l-attività ma baqgħetx taħt il-kontroll tiegħu ma setax jidħol responsabbli għaliha u jispiċċa jnaddaf wara ħaddieħor. Huwa ġust u sew li waqt attività kummerċjali privata, jintużaw fondi pubbliċi biex jagħmlu tajjeb?
Tajjeb li ngħidu li ftit tas-snin ilu l-Kunsill tal-Furjana kien irrifjuta li jnaddaf fuq il-Fosos wara l-attività ta’ Isle of MTV. Il-Kunsill kien qal li mhux sew li mill-flus limitati li għandu, jispiċċa jħallas biex ħaddieħor jistagħna!
Tajjeb li wieħed jitgħallem għall-quddiem. L-ewwel ħaġa nemmen li jekk din l-attività trid tkun taħt ċertu kontroll, hemm bżonn li kulħadd ikun involut. Għalkemm din is-sena l-Kunsill Lokali ma kienx ħareġ sejħa pubblika u skont l-avukat tal-Kunsill seta’ jagħmel dan, nemmen li l-aħjar mod ikun jekk ikun hemm sejħa pubblika għal dawk li jixtiequ jorganizzaw din l-attività. It-tieni ħaġa li wieħed jista’ jgħid hija li jekk il-Gvern jemmen f’din l-attività, allura għandu jidħol responsabbli għaliha hekk kif jidħol responsabbli mill-attività ta’ Isle of MTV. It-tielet ħaġa hija li din l-attività ma għandhiex tibqa’ tiġi organizzata f’din il-lokalità. Jidher li din l-attività kibret ħafna biex tibqa’ sseħħ mingħajr ma r-residenti jispiċċaw minn taħt! Hekk kif attivitajiet simili, bħall-festivals tal-birra jew tal-inbid, spiċċaw jiġu organizzati f’postijiet oħra, wasal iż-żmien li din l-attività toħroġ minn San Ġiljan.
Din hija x-xewqa tal-maġġoranza tar-residenti tagħna.
(Dan l-artiklu ġie ippublikat fuq il-gazzetta Il-Mument – 26 ta' Marzu, 2017)
Comments