Wara tliet snin biss fit-tmexxija, il-Gvern Laburista jinsab taħt dell kbir u tqil ta' korruzzjoni sistematika.
Sakemm il-bniedem huwa bniedem, il-korruzzjoni hija parti mill-ħajja. Il-korruzzjoni hija frott tal-ħażen li hemm f’qiegħ il-bniedem. Għalkemm il-bniedem huwa tajjeb fih innifsu u għandu kapaċità kbira biex jagħmel it-tajjeb, fih ukoll għandu tendenza qawwija għal dak li huwa ħażin.
Fid-diskors soċjali, il-korruzzjoni hija meqjusa bħala forma oħra ta’ inġustizzja soċjali u glorifikazzjoni tal-egoiżmu, meta l-akbar ġid li wieħed jista’ jkollu huwa dak li jaħseb għall-interessi tiegħu mingħajr l-ebda kas ta’ xejn u ħadd.
Bejn korruzzjoni żgħira u korruzzjoni kbira hemm swaba’ twal li jippruvaw jinfiltraw f’kull post, għaqda, organizzazzjoni, partiti politiċi u anke pajjiżi sħaħ.
F’ċerti pajjiżi, is-swaba’ twal tal-korruzzjoni huma mifruxin sew f’kull livell tas-soċjetà. F’ċerti pajjiżi, il-korruzzjoni tant hija kbira li tissejjaħ korruzzjoni istituzzjonalizzata, jiġifieri s-swaba’ tal-korruzzjoni huma fl-istrutturi kollha tat-tmexxija governattiva. Għaliex il-poter u l-flus huma taħlita perikoluża ħafna, f’ċerti pajjiżi wieħed isib partiti politiċi u politikanti li jbillu subgħajhom sew fil-borma tal-pajjiż.
Ilkoll nafu wkoll li hawn pajjjiżi mgħarrqa fil-korruzzjoni. Oħrajn jagħtu kenn lil dawk li jixtiequ jżommu jew ‘jaħslu’ flushom f’segretezzi bankarji. Il-Panama jew il-Virgin Islands huma żewġ pajjjiżi minn diversi oħrajn! Quddiem każi ta’ korruzzjoni x’tagħmel jew x’ma tagħmilx ifisser ħafna. Huwa f’dan il-mument li wieħed juri xi stoffa għandu. Politiku jew mexxej li ma jiħux azzjoni juri x’tip ta’ mexxej hu. Jekk wieħed jagħżel is-skiet, din tissejjaħ kompliċità.
L-istejjer, l-akkużi u d-dellijiet tqal fuq il-Ministru Konrad Mizzi, Keith Schembri (Kasco) u l-eks-Chairman
tat-Times kulħadd sema’ bihom. Huma stejjer li jikxfu li l-qarnita għandha subgħajha twal. Wara tliet snin biss fit-tmexxija, il-Gvern Laburista jinsab taħt dell kbir u tqil ta’ korruzzjoni sistematika.
Livelli ta’ korruzzjoni huma misjuba f’kull amministrazzjoni. Hija d-determinazzjoni ta’ Simon Busuttil u
tal-Partit li nitgħallmu minn dawn l-istejjer.
Imma quddiem dawn il-każi serji ta’ korruzzjoni sistematika ta’ issa, x’attitudni qiegħed jieħu l-Partit Laburista? X’qiegħed jagħmel il-Prim Ministru quddiem dawn l-akkużi serji? Kieku dawn l-akkużi saru fiż-żmien tat-tmexxija Nazzjonalista, Joseph Muscat x’attitudni kien jieħu?
Min-naħa tat-tmexxija tat-Times , il-bord tad-diretturi ta eżempju ċar ta’ wieħed x’għandu jagħmel. Il-membri talbu liċ-Chairman joffri r-riżenja tiegħu. Kienu assertivi.
Wara ġimgħat sħaħ ta’ akkużi, il-Partit Laburista pprova jiċħad dawn l-istejjer. Ipprova jiġġustifika. Ipprova
jgħatti. Ipprova jaħrab billi tkellem fuq kwistjonijiet oħra. Ipprova jitfa’ t-tajn fuq Ann Fenech. Issa qiegħed
jipprova jħammeġ lil Beppe Fenech Adami! U Joseph Muscat x’attitudni ħa?
Għandu raġun Simon Busuttil li waqt il-programm ‘Dissett’ jgħid li: “Ma’ kull ġurnata li tgħaddi u ma
jagħmel xejn, il-Prim Ministru jkompli jdgħajjef il-pożizzjoni tiegħu stess.” Joseph Muscat irid jifhem li meta jieħu din l-attitudni mhux biss jista’ jintefa’ dell ikrah fuqu personali imma qiegħed jitfa’ dell ikrah fuq l-Uffiċċju tiegħu, dak ta’ Prim Ministru ta’ Malta.
Dan ma jgħoddx biss għall-Prim Ministru imma wkoll għal diversi Ministri oħrajn, fosthom il-Ministru tal-
Finanzi li donnu għamel vot ta’ silenzju.
Il-Maltin kollha ta’ rieda tajba ma jistgħux ikollhom Prim Ministru li għandu s-swaba’ tal-korruzzjoni mdawrin miegħu. Il-Maltin ta’ rieda tajba jafu li kif illum qegħdin niċċelebraw il-festa tal-Għid, meta niftakru fir-rebħa tat-tajjeb fuq il-ħażin, anke f’din l-istorja, il-korruzzjoni mhux se jkollha l-aħħar kelma.
Bħal dejjem f’Malta huwa s-sewwa li jirbaħ.
(Dan l-artiklu ġie ippublikat fuq il-gazzetta Il-Mument – 27 ta' Marzu, 2016)
Comments