Id-deputati Laburisti kollha baxxew rashom u dawru l-ħarsa ta’ għajnejhom ’l-isfel. Is-skiet inkiser bil-karba ta’ omm u missier Jean Paul. Qraba oħra tkellmu wkoll. Ix-xena kienet ta’ ksur il-qalb.
Għal darb’ oħra, Robert Abela impika mal-Oppożizzjoni u ma riedx jisma’. Għal darb’ oħra, Robert Abela u sħabu d-deputati kienu fuq in-naħa l-ħażina tal-istorja. Għal darb’ oħra, Roberta Abela u l-Gvern tiegħu kellu mhux biss ibaxxi rasu imma jibla kliemu kollu u jwettaq U-turn oħra. Din kienet it-tielet darba f’dawn l-aħħar xhur.
Ibaxxi rasu u jċedi
L-ewwel kellu jbaxxi rasu għal sentenza storika li l-Qorti ħarġet. F’din is-sentenza, il-Qorti tkellmet b’mod l-aktar ċar li l-kuntratti tal-isptarjiet ma’ Vitals/Stewards kienu frawdolenti u kien hemm qerq mill-bidu sat-tmiem. Għalkemm Robert Abela u sħabu tkellimu wieħed wara l-ieħor kontra l-Partit Nazzjonalista, xorta kellhom jagħtu raġun lill-Partit Nazzjonalista. Għalkemm l-isptarijiet reġgħu lura, s’issa l-miljuni misruqa minn ħalqna għadhom le. Hija mhux biss ħasra imma huwa skandlu li dawn il-flus spiċċaw bħal donnu taru mar-riħ. Ara kemm il-Gvern seta’ jagħmel bihom biex jgħin lil dawk vulnerabbli.
It-tieni darba li Robert Abela kellu jbaxxi rasu u jagħmel U-turn hija fuq il-liġi li kien ser jagħmel biex jidħol l-abort f’pajjiżna taħt skuża tas-saħħa tal-mara. Kull min jifhem, fosthom professjonisti mediċi u esperti tal-liġi, kollha tkellmu b’vuċi waħda li dan kien biss tentattiv fqir ta’ Robert li jdaħħal mit-tieqa l-abort. Il-Partit Nazzjonalista għal darb’ oħra kien fuq in-naħa t-tajba u flimkien mas-soċjetà ċivili tkellem b’mod assertiv li l-ħajja hija valur fundamentali. Wara diversi dibattiti fil-Parlament, fejn l-esponenti tal-Labour kienu dejjem fuq l-attakk u mhux l-ewwel darba tkellmu li aħna, d-deputati tal-PN, konna moħħna magħluq, li qegħdin inbeżgħu u li aħna kontra n-nisa, dawn l-istess deputati laburisti kellhom jibilgħu kliemhom kollu hekk kif Roberta Abela ċeda. Wara li eluf semmgħu leħinhom, kemm waqt protesti li saru u kemm permezz tal-petizzjoni, Roberta Abela kellu jdwawwar fehmtu mill-ġdid.
It-tielet darba hija propju dak li għexna matul il-gimgħat li għaddew.
Għal seba’ xhur, omm Jean Paul Sofia talbet li jkun hemm inkjesta mhux biss maġisterjali imma anke dik pubblika. B’hekk mhux biss il-verità kollha toħroġ imma jinstabu dawk li kienu direttament u indirettament responsabbli għal mewt ta’ dan iż-żagħżugħ. B’hekk, mhux biss issir ġustizzja ma’ l-qraba tiegħu, imma wkoll il-Gvern jieħu l-miżuri kollha biex ma jkunx hemm traġedja oħra. Fil-fatt, dakinhar stess li kellha ssir il-vġili, żagħżugħ ieħor, Mohammed, tilef ħajtu!
Sfortunatament, għal seba’ xhur sħaħ, Robert Abela mhux biss injora din it-talba imma għamel minn kollox biex tintnesa din it-traġedja, ma tant traġedji oħra li seħħew. Kien proprju l-PN li uża dak li tissejjaħ ‘opposition day’, jiġifieri meta l-Oppożizzjoni għandha d-dritt li tagħżel hija liema suġġetti jiġu diskussi f’seduta tal-Parlament.
U propju għaliex il-PN ried u għadu jrid li jkun hemm ġustizzja, għażel proprju li jagħmel tiegħu t-talba għal inkjesta pubblika. Meta din ġiet diskussa fil-Parlament, mill-ġdid il-Partit Laburista spiċċa jimpika u jgħajjar b’mod isteriku! Baqa’ jwebbes rasu tant li l-membri kollha vvutaw kontra l-proposta!
Ili membru tal-Parlament minn 30 t’ Ottubru 2022. Din is-seduta kienet l-aktar waħda kerha u iebsa! Imma li laqatni l-aktar huwa li wara li ttieħed il-vot, waqgħet kalma u silenzju totali! Id-deputati Laburisti kollha baxxew rashom u dawru l-ħarsa ta’ għajnejhom l-isfel. Is-skiet inkiser bil-karba ta’ omm u missier Jean Paul. Qraba oħra tkellmu wkoll. Ix-xena kienet ta’ ksur il-qalb.
L-ironija kollha hija l-partit tal-ħaddiema spiċċa jiddefendi lill-korrotti minflok lill-ħaddiem żagħżugħ.
Il-partit tal-Labour beża’ mill-verità
Il-partit tal-ħaddiema spiċċa b’qalb tal-ġebel u supperv. Il-partit tal-Labour beża mill-verità kollha. Mhux biss. Ftit sigħat wara, Roberta Ablea u sħabu marru jiddivertu ġewwa l-Girgenti u l-għada Robert mar jiġri bid-dgħajsa sa Ragusa. Bla sens ta’ rispett u simpatija għat-tbatija tal-familjari ta’ Jean Paul. Dan mhuwiex il-Labour li diversi vvutaw għalih.
U wara li diversi wrew l-għadab tagħhom għal din l-ebusija u qalu li se jattendu għal vġili quddiem Kastilja, Roberta Ablea reġa’ ċeda u għamel U-turn oħra. Kellu jibla’ kliemu. X’se jgħidu issa d-deputati li tkellmu dakinhar tas-seduta u għajru lilna d-deputati għaliex tkellimna b’mod l-aktar ċar fuq din it-talba? X’ser jgħidu issa? Il-Labour kellu jaċċetta li ssir mhux biss Inkjesta Maġisterjali imma anke Inkjesta Pubblika.
B’hekk il-familja ta’ Sofia u l-poplu kollu, bl-għajnuna tal-PN, reġa rebaħ.
Hemm tama u ġustizzja.
(Dan l-artiklu ġie ippublikat fuq il-gazzetta Il-Mument – 23 ta' Lulju, 2023)
Comments