Jekk verament nirrispettaw liż-żgħażagħ, hemm bżonn li mhux biss nagħtuhom eżempji ta' maturità politika. Lil hinn mill-vot, wieħed għandu joffri eżempji ta' politiċi onesti li kapaċi joffru viżjoni kritika u sens ta' direzzjoni.
Matul dawn l-aħħar ġimgħat, il-Parlament tkellem fuq il-proposta li ż-żgħażagħ ta’ 16-il sena jkunu jistgħu jieħdu sehem attiv fil-ħajja demokratika billi jingħataw id-dritt/dover tal-vot. Jidher li mhux biss iż-żewġ partiti prinċipali imma anke forzi politiċi oħrajn qablu ma’ din il-proposta. Dan huwa kunsens storiku. L-aħħar darba li sar dan it-tip ta’ qbil kien proprju fissena 2000 meta kien hemm qbil fuq il-mozzjoni li persuni bi bżonnijiet speċjali jingħataw opportunitajiet indaqs.
Matul id-diskussjoni fuq il-vot 16 kienu diversi l-kelliema miż-żewġ naħat tal-Kamra li tkellmu u qalu li ż-żgħażagħ għandhom jingħataw dan il-leħen biex b’hekk ikunu minn issa ċittadini attivi u protagonisti tal-futur tagħhom u ta’ pajjiżna. Diversi tkellmu li dan il-vot huwa att ta’ fiduċja fil-kapaċitajiet u l-ħiliet taż-żgħażagħ.
Fid-dawl tal-fatt li għal diversi snin ħdimt fost iż-żgħażagħ u magħhom, b’mod partikolari dawk iż-żgħażagħ f’San Ġwann, nemmen bis-sħiħ mhux biss fil-potenzjal li huma għandhom bħala ċittadini imma li l-vot jagħtihom sens qawwi ta’ komunit., xi ħaġa li aktar ma jgħaddi żmien, aktar qiegħda tonqos fostna.
Nistqarr ukoll li għalkemm ninsab kuntent bid-diskussjoni, inħoss li ċerti politiċi qalu dak li qalu mhux
għax jemmnu f’dak li qalu imma għax riedu jinstemgħu sbieħ u jintgħoġbu. Għal dawn il-politiċi fejn jaqbilhom huma favur iż-żgħażagħ u li dawn huma persuni maturi imma meta l-istess żgħażagħ jgħidu xi ħaġa li ma ddoqqx għal widnejhom, dawn l-istess politiċi jbiddlu d-diska u jilmentaw kemm iż-żgħażagħ huma immaturi!
Dan ħareġ fil-beraħ ftit tal-ġranet wara l-vot 16 meta żagħżugħ tkellem quddiem il-President ta‘ Malta. Ma kienx messaġġ indirizzat daqstant lill-President attwali u fil-kapaċità tagħha bħala persuna imma l-indirizz ta’ dan iż-żagħżugħ kien lejn il-President bħala simbolu tan-nazzjon Malti. Għaldaqstant, dan kien messaġġ lin-nazzjon.
X’qal dan iż-żagħżugħ lill-President? Fil-qosor, qal:
- Il-Partit Laburista ma għadux partit tal-ħaddiem imma spiċċa partit li jieħu interessi ta’ dawk li jridu jużawh għall-ġid personali tagħhom. Iż-żagħżugħ qal li l-Partit Laburista spiċċa donnu customer care ta’ ċerti nies;
- Mhux vallapena li persuna tinvesti fl-edukazzjoni biex timxi ’l quddiem imma jgħodd lil min taf u jekk wieħed hux viċin ta’ Kastilja ta’ Joseph! Wieħed jinsa s-slogan Laburista li mhux lil min taf imma kemm taf!;
- Donnu min huwa korrott jimxi ’l quddiem fil-ħajja waqt li min huwa onest u ħabrieki jibqa’ lura. Min jevita t-taxxi jmexxi u jgħaddi, u min iħallashom fil-ħin jaqlagħha fuq rasu! Min jgħawweġ donnu jgawdi waqt li min jipprova jimxi b’subgħajh dritt jispiċċa ħażin u mwarrab!
L-ipokresija Laburista ħarġet meta waqt li ftaħru kemm jirrispettaw liż-żgħażagħ, għaliex ma għoġobhomx dan id-diskors spiċċaw jgħajru lil dan iż-żagħżugħ bħala immatur u pupu tan-Nazzjonalisti!
Għalkemm fuq l-ewwel żewġ punti wieħed jista’ jagħmel diskors politiku u allura wieħed jista’ ma jaqbilx,
it-tielet punt wieħed ta’ min verament jinkwieta dwaru għax imur lil hinn minn diskors politiku. Tkun traġedja demokratika jekk pajjiżna jispiċċa jitlef is-sens ta’ legalità. Tkun traġedja demokratika jekk pajjiżna jispiċċa li dak li huwa ħażin jitqies bħala tajjeb.
Tkun traġedja demokratika jekk nitilfu s-sens kritiku li nagħżlu bejn it-tajjeb u l-ħażin. Mhux hekk biss. Jekk verament nispiċċaw f’dan l-istat, x’messaġġ qegħdin inwasslu lil uliedna, iċ-ċittadini ta’ Malta futura? Inkunu verament ġibna l-ġebla fuq saqajna!
Jekk verament inħobbu u nirrispettaw liż-żgħażagħ tagħna, hemm bżonn li mhux biss nagħtuhom il-vot
imma nagħtuhom eżempji ta’ maturit. politika. Lil hinn mill-vot, wieħed għandu joffri eżempji ta’ politika onesta u ta’ politiċi onesti li kapaċi joffru viżjoni kritika u sens ta’ direzzjoni. Nemmen li jekk dan ma jseħħx, allura hemm riskju li l-vot 16 huwa wieħed manupulattiv u se jżid il-firda u l-immaturit. politika. Il-politiċi attwali għandhom responsabbilt. li joffru edukazzjoni politika fejn il-vot mhux biss karta li tista’ tintuża biex tieħu li trid, imma hija vuċi kritika u strument li bih wieħed jista’ jibni soċjetà aħjar.
Iż-żgħażagħ huma onesti u jemmnu fl-onestà. Ejjew inkunu onesti magħhom ukoll.
(Dan l-artiklu ġie ippublikat fuq il-gazzetta Il-Mument – 11 ta' Frar, 2018)
Comments